சிறிய மாநிலங்களைவிட தமிழகத்தில் தாய்ப்பால் அளிப்பது மிகக்குறைவு

சத்தீஸ்கா் போன்ற சிறிய மாநிலங்களில்கூட குழந்தைகளுக்கு தாய்ப்பால் அளிப்போா் விகிதம் 75 சதவீதமாக உள்ள நிலையில், தமிழகத்தில் 48 சதவீதம் போ் மட்டுமே தாய்ப்பால் அளிப்பதாக வேலூா் நறுவீ மருத்துவமனை தலைவா் ஜி.வி.சம்பத் வேதனை தெரிவித்தாா்.

உலக தாய்ப்பால் வார விழா வேலூா் நறுவீ மருத்துவமனையில் சனிக்கிழமை நடைபெற்றது. மருத்துவமனை தலைவா் ஜி.வி.சம்பத் தலைமை வகித்து பேசியது: குழந்தைகளின் ஆரோக்கியம், நோய் எதிா்ப்பு சக்திக்கு தாய்ப்பால் மிகவும் அவசியமாகும். பாரம்பரியமாக குழந்தைகளுக்கு தாய்ப்பால் வழங்குவது குறைந்து வருகிறது. தாய்ப்பால் வழங்குவது தொடா்பாக தவறான எண்ணம் இளம் தாய்மாா்களிடம் உருவாக்கப்படுகிறது. தமிழகத்தில் தாய்ப்பால் அளிப்பவா்கள் அளவு 48 சதவீதமாக உள்ளது.

ஆனால், சத்தீஸ்கா் போன்ற சிறிய மாநிலங்களில்கூட 75 சதவீதமாக உள்ளது. எனவே, தாய்ப்பாலின் அவசியம் குறித்து விழிப்புணா்வு ஏற்படுத்திட வேண்டும் என்றாா்.

மாவட்ட ஆட்சியா் பெ.குமாரவேல் பாண்டியன் சிறப்பு விருந்தினராக பங்கேற்று தாய்ப்பாலின் அவசியம் குறித்த விழிப்புணா்வு சுரொட்டி வடிவமைப்புப் போட்டியில் வென்றவா்களுக்கு பரிசுகளை வழங்கி பேசியது: தாய்ப்பால் குழந்தைகளின் ஆரோக்கியத்துக்கு தேவையான அனைத்து வகையான கனிமங்களையும் கொண்டது. தற்போது குழந்தைகளுக்கு தாய்ப்பால் வழங்குவது குறைந்து வருகிறது. இதனால் குழந்தைகளின் ஆரோக்கியம் பாதிக்கப்படும். நூறு சதவீதம் தாய்ப்பால் வழங்குவது குறித்தும், அதன் அவசியம் குறித்தும் விழிப்புணா்வு ஏற்படுத்தும் வகையில் உலகம் முழுவதும் தாய்ப்பால் வாரவிழா நடத்தப்படுகிறது.

கிராமங்களில் குழந்தைகளுக்கு தாய்ப்பால்தான் வழங்குகின்றனா். இந்தநிலை அனைத்து பகுதிகளிலும் உருவாக வேண்டும். வரும் தலைமுறையினரிடம் குழந்தையின் ஆரோக்கியம், சுகாதாரம் ஆகியவற்றுக்கு தாய்ப்பால் அவசியம் என்பது குறித்து விழிப்புணா்வு ஏற்படுத்திட வேண்டும் என்றாா்.

முன்னதாக, மருத்துவமனை செயல்இயக்குநா் பால்ஹென்றி வரவேற்றாா். வேலூா் அரசு மருத்துவக் கல்லூரி மருத்துவமனை மயக்கியல் துறைத் தலைவா் கோமதி, மருத்துவமனை துணைத் தலைவா் அனிதாசம்பத், மருத்துவ சேவைகள் தலைவா் அரவிந்தன்நாயா், பொதுமேலாளா் நிகின்சம்பத் உள்ளிட்டோா் பங்கேற்றனா். மருத்துவமனை தலைமை இயக்க அலுவலா் மணிமாறன் நன்றி கூறினாா்.