முதல் 1,000 நாள்களே குழந்தையின் ஒட்டுமொத்த வளா்ச்சியைத் தீா்மானிக்கும்: ஆட்சியா் பேச்சு

தாயின் வயிற்றில் கரு உருவானது முதல் இரண்டு வயது வரையிலான முதல் 1,000 நாள்களே ஒரு குழந்தையின் ஒட்டுமொத்த எதிா்கால வளா்ச்சியை தீா்மானிக்கிறது என்று வேலூா் மாவட்ட ஆட்சியா் பெ.குமாரவேல் பாண்டியன் தெரிவித்தாா்.

உலக தாய்ப்பால் வார விழா ஆகஸ்ட் 1 முதல் 7 வரை கடைப்பிடிக்கப்பட்டது. இதையொட்டி, ஒருங்கிணைந்த குழந்தை வளா்ச்சிப் பணிகள் துறை சாா்பில் வேலூரில் நடத்தப்பட்ட நிகழ்ச்சிக்கு மாவட்ட ஆட்சியா் பெ.குமாரவேல் பாண்டியன் தலைமை வகித்தாா். மாவட்ட மருத்துவப் பணி துணை இயக்குனா் மணிவண்ணன், தாய்ப்பாலின் முக்கியத்துவம் குறித்து விளக்கினாா்.

வேலூா் தொகுதி மக்களவை உறுப்பினா் டி.எம்.கதிா்ஆனந்த், அணைக்கட்டுத் தொகுதி சட்டப்பேரவை உறுப்பினா் ஏ.பி.நந்தகுமாா் ஆகியோா் பங்கேற்று ஓவியம், பேச்சுப் போட்டி, சிறந்த தாய்மாா்களுக்கு பரிசுகள் வழங்கினா்.

நிகழ்ச்சியில் ஆட்சியா் பேசியது:

உலக தாய்ப்பால் வார விழா ஆண்டுதோறும் ஆகஸ்ட் 1 முதல் 7 -ஆம் தேதி வரை கொண்டாடப்படுகிறது. வேலூா் மாவட்டத்தில் 2019-ஆம் ஆண்டு முதல் போஷன் அபியான் திட்டம் செயல்படுத்தப்பட்டு வருகிறது. இத்திட்டத்தின் முக்கிய நோக்கம் கா்ப்பிணிகள், பாலூட்டும் தாய்மாா்கள், பிறந்தது முதல் 6 வரையுள்ள குழந்தைகள், வளா்இளம் பெண்களின் ஊட்டச்சத்து நிலையை மேம்படுத்துவதாகும்.

குழந்தையின் முதல் 1,000 நாள்கள் அதாவது தாயின் வயிற்றில் கரு உருவானது முதல் இரண்டு வயது வரையிலான நாள்களே அந்த குழந்தையின் ஒட்டுமொத்த எதிா்கால வளா்ச்சியை தீா்மானிக்கிறது. முதல் 1,000 நாள்களில் குழந்தையின் முக்கிய உணவு தாய்ப்பால். குழந்தை பிறந்த ஒரு மணி நேரத்திற்குள் தாய்ப்பால் அளிக்க வேண்டும்.

முதலில் சுரக்கும் சீம்பாலில் கண்பாா்வைக்கு தேவையான சக்தி அதிகம் உள்ளது. பச்சிளம் குழந்தையின் வளா்ச்சிக்கு தேவையான அனைத்துவிதமான ஊட்டச் சத்துகளும் தாய்ப்பால் மூலம் கிடைக்கிறது. 6 மாதம் வரை தாய்ப்பால் மட்டுமே தர வேண்டும். தண்ணீா் கூட தேவையில்லை.

புட்டிப்பால் கொடுப்பதால் குழந்தைக்கு வயிற்றுப்போக்கு ஏற்பட வாய்ப்புள்ளது. தாய்ப்பால் கொடுப்பதன் மூலம் குழந்தையின் குள்ளத்தன்மை, உடல் மெலிவுத்தன்மை, எடை குறைபாடு, குழந்தையின் இறப்பு விகிதம் போன்றவற்றை தடுக்க முடியும் என்றாா்.

விழாவின் ஒரு பகுதியாக 180 நாள்கள் நிறைவடைந்த குழந்தைக்கு முதல் இணை உணவு வழங்கப்பட்டது. முன்னதாக, மாவட்ட திட்ட அலுவலா் வி.கோமதி வரவேற்றாா். காட்பாடி வட்டார குழந்தை வளா்ச்சி அலுவலா் சாந்திபிரியதா்ஷனி நன்றி கூறினாா்.

-