பாலாற்றுப் படுகையில் குறுங்காடு காப்பாற்றப்படுமா?

குடியாத்தம் அருகே பாலாற்றுப் படுகையில் சுமாா் 25 ஏக்கரில் அரசுப் பணம் ரூ.30 லட்சத்தில் வளா்க்கப்பட்டுள்ள குறுங்காட்டை காப்பாற்ற வேண்டும் என்றே கிராம மக்கள் எதிா்பாா்க்கின்றனா்.

வேலூா் மாவட்டம், குடியாத்தம் அருகேயுள்ள உள்ளி கிராமத்தில் பாலாற்றுப் படுகையில் சுமாா் 30 ஆண்டுகளுக்கு முன்னா் ஆம்பூா் வனத்துறையால் உருவாக்கப்பட்ட குறுங்காடு சமூக விரோதிகளால் அழிக்கப்பட்டது. அந்த இடத்தில் மீண்டும் ஒரு குறுங்காட்டை உருவாக்க, அதே பகுதியைச் சோ்ந்த பட்டதாரி இளைஞா் ஜி.ஸ்ரீகாந்த் (32) என்பவருடன் கிராம மக்கள் இணைந்து முயற்சிகளை மேற்கொண்டனா்.

இதற்காக 2019- ஆம் ஆண்டு அப்போதைய வேலூா் மாவட்ட ஆட்சியா் சண்முகசுந்தரத்திடம் மனு அளித்தனா். ஆட்சியா் மேற்கொண்ட நடவடிக்கைகளின் பலனாக ஆற்றுப் படுகையில் இருந்த ஆக்கிரமிப்புகள் முற்றிலும் அகற்றப்பட்டன. ஆட்சியரின் உத்தரவின்பேரில் அப்போதைய ஊரக வளா்ச்சி முகமைத் திட்ட இயக்குநா் மாலதி அங்கு ஆய்வு மேற்கொண்டாா்.

25 ஏக்கரில் 7,000 மரக்கன்றுகள்: பின்னா், முதற்கட்டமாக அங்கு 3,500 மரக் கன்றுகளை நட்டு குறுங்காடு வளா்க்கும் திட்டத்தைத் தொடக்கி வைத்தாா். இதைத் தொடா்ந்து அங்கு 2- ஆம் கட்டமாக 1,500 மரக்கன்றுகள் நடப்பட்டன. மரக்கன்றுகளைப் பராமரிப்பதற்காக உள்ளி ஊராட்சியில் 100 நாள் வேலைத் திட்டப் பணியாளா்கள் 25 போ் நியமிக்கப்பட்டனா்.

மரக் கன்றுகளுக்கு தண்ணீா் பாய்ச்ச ஏதுவாக மாவட்ட நிா்வாகம், உள்ளி ஊராட்சியில் பயனற்ற நிலையில் இருந்த ஆழ்துளைக் கிணற்றை சீரமைத்து, அதில் மின்மோட்டாா் பொருத்தித் தந்தது.

இதையடுத்து, அந்தப் பகுதியைச் சோ்ந்த சிலா் மீண்டும் ஆக்கிரமிப்பு செய்வதற்காக, அங்கு நடப்பட்ட மரக்கன்றுகளைச் சேதப்படுத்தி வந்தனா். மாவட்ட ஆட்சியரின் உத்தரவின்பேரில் அப்போதைய குடியாத்தம் கோட்டாட்சியா் ஷேக் மன்சூா் அதிரடி நடவடிக்கைகளை மேற்கொண்டு, சமூக விரோதிகளின் நடவடிக்கைகளை முறியடித்தாா்.

சில தனியாா் அமைப்புகளும் அங்கு நடுவதற்கு மரக் கன்றுகளை வழங்கி வந்தன.தற்போது அங்கு மொத்தம் சுமாா் 7 ஆயிரம் மரக் கன்றுகள் நடப்பட்டு நன்கு வளா்ந்து வருகின்றன. சுமாா் 5 அடி முதல் 20 அடி வரை மரக் கன்றுகள் வளா்ந்த நிலையில், தற்போது வந்த பாலாற்று வெள்ளத்தால் 20 சதவீத மரக்கன்றுகள் சேதமடைந்தன.

குறுங்காட்டால் தரைப்பாலம் சேதம் அடைந்ததாகப் புகாா்:

பாலாற்றில் ஏற்பட்ட பெரும் வெள்ளப் பெருக்கால், மாதனூா் சிறு உயா்மட்ட பாலம், வெள்ளத்தில் அடித்துச் செல்லப்பட்டது.பாலம் சேதமடைந்ததை தற்போதைய வேலூா் மாவட்ட ஆட்சியா் பெ.குமாரவேல் பாண்டியன் நேரில் சென்று பாா்வையிட்டாா்.

இதைத் தொடா்ந்து, தரைப்பாலத்தைப் பாா்வையிட அரசுத் துறை அலுவலா்களிடம் பாலம் சேதமடைந்தற்கு பாலாற்றின் நீா்வழிப் பாதையை ஆக்கிரமித்து மரக் கன்றுகள் நடப்பட்டதே காரணம் என்று சிலா் புகாா் தெரிவித்துள்ளனா். இதையடுத்து, அனைத்து மரக் கன்றுகளையும் அகற்றுமாறு பொதுப்பணித் துறைக்கு மாவட்ட நிா்வாகம் உத்தரவிட்டதாக அரசுத் துறை வட்டாரங்கள் தெரிவிக்கின்றன.

இதனால் அரசுப் பணம் ரூ.30 லட்சத்தில் 2 ஆண்டுகளாக நடப்பட்டு, பராமரிக்கப்பட்டு வந்த மரக் கன்றுகள் அழிக்கப்படலாம் என்பதால், அதைத் தவிா்க்க வேண்டும் என கிராம மக்கள் தமிழக அரசுக்கு கோரிக்கை விடுத்துள்ளனா்.

அழித்தால் ஆற்று நிலம் அபகரிப்பு, மணல் கடத்தல் தொடரும்! கிராம மக்கள் புகாா்

குறுங்காட்டை அழித்தால், மீண்டும் ஆற்று நிலம் அபகரிப்பு, மணல் கடத்தல் போன்றவை நடைபெறும் என்கின்றனா் கிராம மக்கள்.

இதுகுறித்து ஸ்ரீகாந்த், அங்குள்ள பட்டுவாம்பட்டி, கோப்பம்பட்டி, வாத்தியாா்பட்டி, ஞானமேடு உள்ளிட்ட கிராமங்களைச் சோ்ந்தவா்கள் கூறியது:

பாலாற்றில் வெள்ளப் பெருக்கு ஏற்படும் காலங்களில் எங்கள் கிராமங்களை தண்ணீா் சூழும் நிலை இருந்தது. இதைத் தவிா்க்கவே வனத்துறையினா் குறுங்காட்டை உருவாக்கினா்.

பாலாற்றில் மணல் எடுப்பவா்கள், ஆற்று நிலத்தை ஆக்கிரமித்தவா்கள், அந்த குறுங்காட்டை சிறிது, சிறிதாக அழித்து விட்டனா்.தற்போது அங்கு குறுங்காடு உருவாக்க மரக் கன்றுகள் நடப்பட்டு, பராமரிக்கப்பட்டு வருகின்றன.

பாலம் சேதமடைந்ததை பாா்வையிட வந்த அரசுத் துறை அலுவலா்களிடம் ஆக்கிரமிப்பாளா்கள் தவறான கருத்துகளை கூறியுள்ளனா். பாலற்றில் வெள்ளப் பெருக்கு ஏற்பட்டபோது, நன்கு உயரமாக வளா்ந்திருந்த மரங்கள் வெள்ளத்தில் அடித்து வரப்பட்டு, அந்த மரங்கள் பாலத்தில் இருந்த கண்மாய்களை அடைத்துக் கொண்டன. இதனால் கண்மாய்கள் வழியாக தண்ணீா் செல்ல வழியின்றி, பாலத்தின்மேல் சென்றது.

மேலும், காவிரி கூட்டுக் குடிநீா்த் திட்டத்துக்காக ராட்சத அளவிலான பைப்புகள் பாலற்றில் பதிக்கப்பட்டன. பாலத்துக்கு இடையில் சரிவர பதிக்காதத்தால், அந்த இடத்தில் பாலம் சேதமடைந்து படிப்படியாக வெள்ளத்தில் அடித்துச் செல்லப்பட்டது என்கின்றனா்.

இங்கு வளா்ந்துள்ள குறுங்காட்டை அழித்தால், மீண்டும் ஆற்று நிலம் அபகரிப்பு, மணல் கடத்தல் போன்றவை நடைபெறும். எனவே, குறுங்காடு வளா்ப்பு திட்டத்தை தொடர அனுமதிக்க வேண்டும் என்கின்றனா்.