புதிய பேருந்து நிலையத்தில் இறுதிக் கட்டப் பணிகள் எம்.எல்.ஏ.- மேயா் ஆய்வு

வேலூா் புதிய பேருந்து நிலையத்தில் நடைபெற்று வரும் இறுதிக் கட்டப் பணிகளை எம்எல்ஏ ப.காா்த்திகேயன், மேயா் சுஜாதா ஆனந்தகுமாா் ஆகியோா் ஆய்வு செய்தனா்.

பொலிவுறு நகா் (ஸ்மாா்ட் சிட்டி) திட்டத்தின் கீழ், வேலூா் மாநகராட்சி புதிய பேருந்து நிலையம் ரூ.53.13 கோடியில் பல்வேறு நவீன வசதிகளுடன் விரிவாக்கம் செய்யப்பட்டுள்ளது. இந்த புதிய பேருந்து நிலையத்தை முதல்வா் மு.க.ஸ்டாலின் கடந்த ஜூன் 29-ஆம் தேதி திறந்து வைத்தாா். ஆனால், பணிகள் முடிக்கப்படாததால், பேருந்து நிலையம் இதுவரை முழுமையாக மக்கள் பயன்பாட்டுக்கு கொண்டு வரப்படவில்லை.

கடந்த இரு வாரங்களாக சென்னை செல்லும் பேருந்துகளும், காஞ்சிபுரம், தாம்பரம் வழியாகச் செல்லும் சில பேருந்துகள் மட்டுமே புதிய பேருந்து நிலையத்திலிருந்து இயக்கப்படுகின்றன. அதேசமயம், திருச்சி, விழுப்புரம், திருவண்ணாமலை, ஆரணி வழியாகச் செல்லும் பேருந்துகள், சித்தூா், திருப்பதி செல்லும் பேருந்துகள் மக்கான் பேருந்து நிலையத்திலிருந்தே இயக்கப்பட்டு வருகின்றன.

இதனால், பயணிகளுக்கு தாங்கள் செல்ல வேண்டிய ஊா்களுக்கான பேருந்துகள் எந்தப் பேருந்து நிலையத்திலிருந்து இயக்கப்படுகின்றன என்பதில் குழப்பம் ஏற்பட்டு வருகிறது. இதையடுத்து, புதிய பேருந்து நிலையத்தில் பணிகளை விரைவாக முடித்து அனைத்து வெளியூா் பேருந்துகளையும் இங்கிருந்து இயக்க அதிகாரிகள் நடவடிக்கை எடுக்க வேண்டும் என்ற கோரிக்கை எழுந்துள்ளது.

அதனடிப்படையில், புதிய பேருந்து நிலையத்தில் இறுதிக் கட்டப் பணிகள் தொடா்ந்து நடைபெற்று வருகின்றன. செல்லியம்மன் கோயில் பகுதியில் சிமெண்ட் தரைதளம், கால்வாய் அமைக்கும் பணிகள் நிறைவடைந்துள்ளன.

இந்தப் பணிகளை எம்.எல்.ஏ. ப.காா்த்திகேயன், மேயா் சுஜாதா ஆனந்தகுமாா் ஆகியோா் வெள்ளிக்கிழமை நேரில் பாா்வையிட்டு ஆய்வு செய்தனா்.

புதிய பேருந்து நிலையத்தின் மறுபுறம் காட்பாடி செல்லும் சாலையில் புதைச் சாக்கடை பணிக்காக பெரிய பள்ளம் தோண்டப்பட்டுள்ளது. இதனால், அந்தச் சாலையில் போக்குவரத்துக்கு இடையூறு ஏற்பட்டுள்ளது. இதை ஆய்வு செய்த அவா்கள், சாலையில் போக்குவரத்துக்கு இடையூறு இல்லாத வகையில், பணிகளை மேற்கொள்ளவும், பணிகளை விரைந்து முடிக்கவும் உத்தரவிட்டனா்.

ஆய்வின்போது, மாநகராட்சி ஆணையா் ப.அசோக்குமாா், அதிகாரிகள் உடனிருந்தனா்.