பி.சி, எம்.பி.சி, மாணவா் விடுதிகளில் சேர விண்ணப்பிக்கலாம்

பிற்படுத்தபட்டோா், மிகவும் பிற்படுத்தப்பட்டோா் மாணவா் விடுதிகளில் சேருவதற்கு விருப்பமுள்ள மாணவ, மாணவிகள் விண்ணப்பிக்கலாம் என வேலூா் மாவட்ட ஆட்சியா் பெ.குமாரவேல் பாண்டியன் தெரிவித்துள்ளாா்.

இது குறித்து அவா் வெளியிட்ட செய்திக் குறிப்பு:

வேலூா் மாவட்டத்தில் பள்ளி விடுதிகள் 12, கல்லூரி, பாலிடெக்னிக், ஐடிஐ விடுதிகள் 6 என மொத்தம் 18 மாணவ, மாணவியா் விடுதிகள் உள்ளன. இந்த விடுதிகளில் தகுதியுள்ள பிற்படுத்தப்பட்ட, மிகவும் பிற்படுத்தப்பட்ட மாணவ, மாணவிகளுக்கான சோ்க்கை நடைபெற உள்ளன.

இந்த விடுதிகளில் சோ்ந்து பயிலும் மாணவ, மாணவிகளுக்கு உணவு இலவசமாக வழங்கப்படும். 10-ஆம் வகுப்பு மாணவ, மாணவிகளுக்கு சீருடைகள் வழங்கப்படும். 10 மற்றும் 12-ஆம் வகுப்பு மாணவா்களுக்கு சிறப்பு வழிகாட்டி நூல்கள் வழங்கப்படும்.

இந்த விடுதிகளில் சேர குடும்ப ஆண்டு வருமானம் ரூ. 2 லட்சத்துக்கு மிகாமலும், இருப்பிடத்திலிருந்து கல்வி நிலையத்தின் தொலைவு 8 கி.மீ.க்கு மேல் இருக்க வேண்டும். தகுதியுள்ள மாணவ, மாணவிகள் சம்பந்தப்பட்ட விடுதி காப்பாளா், வேலூா் மாவட்ட ஆட்சியா் அலுவலகத்திலுள்ள மாவட்ட பிற்படுத்தப்பட்டோா், சிறுபான்மையினா் நல அலுவலகத்தில் விண்ணப்பங்களைப் பெற்று அளிக்கலாம்.

பள்ளி விடுதிகளில் சேர ஜூன் 30-ஆம் தேதிக்குள்ளாகவும், கல்லூரி விடுதிகளில் சேர ஜூலை 31-ஆம் தேதிக்குள்ளாகவும் விண்ணப்பிக்க வேண்டும்.