வேலைநிறுத்தத்துக்கு காட்மா, ஆட்டோ தொழிலாளர் சங்கங்கள் ஆதரவு

கோவையில் வியாழக்கிழமை (ஏப்ரல் 5) நடைபெறும் பொது வேலை நிறுத்தப் போராட்டத்துக்கு குறுந்தொழில் முனைவோர் சங்கம், ஆட்டோ தொழிற்சங்கங்கள் ஆதரவு தெரிவித்துள்ளன.
இது தொடர்பாக காட்மா சங்கத் தலைவர் எஸ்.ரவிக்குமார் வெளியிட்டுள்ள அறிக்கை:
காவிரி மேலாண்மை வாரியம் அமைக்க வலியுறுத்தி அரசியல் கட்சிகள், விவசாய சங்கங்கள், பொது நல அமைப்புகள் சார்பில் வியாழக்கிழமை நடைபெறும் வேலை நிறுத்தப் போராட்டத்துக்கு குறுந்தொழில் முனைவோர் சங்கம் ஆதரவு தெரிவிக்கிறது. கோவை, திருப்பூர் மாவட்டங்களைச் சேர்ந்த சுமார் 30 ஆயிரம் தொழிற்கூடங்கள் மூடப்படும் எனத் தெரிவிக்கப்பட்டுள்ளது.
ஆட்டோக்கள் ஓடாது... இது குறித்து கோவை மாவட்ட அனைத்து ஆட்டோ சங்கக் கூட்டுக் கமிட்டி தலைவர் பி.கே.சுகுமாறன் வெளியிட்டுள்ள அறிக்கையில்,  இந்தப் போராட்டத்துக்கு அனைத்து ஆட்டோ தொழிற்சங்கங்களும் ஆதரவு தெரிவித்துள்ளன. கோவை மாவட்டத்தில் உள்ள அனைத்து ஆட்டோ தொழிலாளர்களும் வேலைநிறுத்தத்தில் பங்கேற்க இருப்பதால் கோவையில் வியாழக்கிழமை ஆட்டோக்கள் இயக்கப்படமாட்டாது என்றார்.