மேட்டுப்பாளையம் ரயில் நிலையத்தில் இருந்து கூடுதல் ரயில்கள்: ஆலோசனைக் கூட்டத்தில் கோரிக்கை

கோவை மாவட்டம், மேட்டுப்பாளையம் ரயில் நிலையத்தில் இருந்து கூடுதல் ரயில்களை இயக்க வேண்டும் என்று ரயில் நிலைய ஆலோசனைக் குழு உறுப்பினர்கள் கூட்டத்தில் வலியுறுத்தப்பட்டுள்ளது.
மேட்டுப்பாளையம் ரயில் நிலைய ஆலோசனைக் குழு உறுப்பினர்கள் பங்கேற்ற ஆலோசனைக் கூட்டம், சேலம் ரயில்வே கோட்ட உதவி வணிக மேலாளர் எம்.ஷாஜகான் தலைமையில் மேட்டுப்பாளையத்தில் செவ்வாய்க்கிழமை நடைபெற்றது. மேட்டுப்பாளையம் ரயில் நிலைய அதிகாரி வேதநாயகம் முன்னிலை வகித்தார்.
ஆலோசனைக் குழு உறுப்பினர்கள் டி.சதீஷ்குமார், எம்.ஜெய்குமார், ஒய்.எம்.ஹபிபுல்லா, பி.ராஜ்குமார், ஜார்ஜ் குட்டி, ரயில்வே முதன்மை வணிக ஆய்வாளர் சிட்டிபாபு உள்ளிட்டோர் கலந்து கொண்டு பல்வேறு கோரிக்கைகளை வலியுறுத்திப் பேசினர்.
மேட்டுப்பாளையம் ரயில் நிலையத்தில் இருந்து கூடுதல் ரயில்களை இயக்க வேண்டும். மேட்டுப்பாளையத்திலிருந்து கோவை செல்லும் பயணிகள் ரயில் சேவையை ஞாயிற்றுக்கிழமையும் தொடர வேண்டும். இந்த ரயிலில் கூடுதலாக 3 பெட்டிகளை இணைக்க வேண்டும்.
 மேட்டுப்பாளையம் நகரின் போக்குவரத்து நெரிசலைக் குறைக்கும் வகையில், சிவம் தியேட்டர் எதிர்ப்புறம் உள்ள ரயில்வே கேட்டை கூடுதலாக 2 மணி நேரம் திறந்து வைக்க வேண்டும். பெரியநாயக்கன்பாளையம் ரயில் நிலையத்தில் இருந்து தினமும் 500-க்கும் மேற்பட்ட மாணவர்கள் கல்வி நிறுவனங்களுக்கு செல்ல ரயிலில் பயணிப்பதாலும், அங்கிருந்து கோவைக்கு 100-க்கும் மேற்பட்டோர் செல்வதாலும், காலை நேரத்தில் அங்கு ரயில்கள் நின்று செல்லும் நேரத்தை ஒரு நிமிடத்திலிருந்து இரண்டு நிமிடமாக அதிகரிக்க வேண்டும்.
அதேபோல, பெரியநாயக்கன்பாளையம் ரயில் நிலையத்தில் குடிநீர், கழிப்பிடம் உள்ளிட்ட அடிப்படை வசதிகளை செய்து தர வேண்டும். மேட்டுப்பாளையம் ரயில் நிலைய நுழைவாயிலை சீரமைத்து, போதிய மின் விளக்குகளை அமைக்க வேண்டும்.
கூடுதல் கட்டணம் வசூலிக்கும் ஆட்டோ ஓட்டுநர்கள் மீது நடவடிக்கை எடுக்க வேண்டும். போக்குவரத்து நெரிசலை ஏற்படுத்தும் வகையில் அமைந்துள்ள ஆட்டோ நிறுத்தங்களை இடமாற்றம் செய்ய வேண்டும் என்பன உள்ளிட்ட கோரிக்கைகளை ஆலோசனைக் குழு உறுப்பினர்கள் வலியுறுத்திப் பேசினர். இந்த கோரிக்கைகள் தொடர்பாக கோட்ட மேலாளரிடம் கலந்து பேசி உரிய நடவடிக்கை எடுக்க இருப்பதாக ரயில்வே அதிகாரிகள் தெரிவித்தனர்.