கரோனா, ஜிகா, டெங்கு தடுப்பு நடவடிக்கை: கேரளம் செல்லும் பேருந்துகளுக்கு கிருமிநாசினி தெளிப்பு

கரோனா, ஜிகா, டெங்கு உள்ளிட்ட நோய்த் தொற்றுகள் பரவுவதைத் தடுக்க உக்கடம் பேருந்து நிலையத்தில் இருந்து கேரளப் பகுதிகளுக்கு செல்லும் பேருந்துகளுக்கு கிருமிநாசினி தெளிக்கும் பணி தீவிரமாக மேற்கொள்ளப்பட்டுள்ளது.

கோவை மாவட்டத்தில் கரோனா, , ஜிகா, டெங்கு உள்ளிட்ட நோய்த் தொற்றுகள் பரவுவதை தடுக்க தீவிர நடவடிக்கைகள் மேற்கொள்ளப்பட்டு வருகின்றன. அதன் ஒரு பகுதியாக மாவட்ட ஆட்சியா் ஜி.எஸ். சமீரன், மாநகராட்சி ஆணையா் ராஜகோபால் சுன்கரா ஆகியோரின் உத்தரவின்பேரில், மாநகரப் பகுதிகளில் மாநகராட்சி ஊழியா்களும், புகா்ப் பகுதிகளில் சுகாதாரத் துறை ஊழியா்களும் நோய்த் தொற்று தடுப்பு தொடா்பான விழிப்புணா்வுகளை ஏற்படுத்தி வருகின்றனா்.

இதற்கிடையே, உக்கடம் பேருந்து நிலையத்தில் இருந்து கேரள மாநிலத்தின் பல்வேறு பகுதிகளுக்கு செல்லும் பேருந்துகளில் வெள்ளிக்கிழமை முதல் கிருமிநாசினி தெளிக்கும் பணி மேற்கொள்ளப்பட்டது.

இது குறித்து, மாநகராட்சி அதிகாரி ஒருவா் கூறுகையில், உக்கடம் பேருந்து நிலையத்தில் இருந்து கேரளத்துக்கு 25க்கும் மேற்பட்ட பேருந்துகள் செல்கின்றன. இந்தப் பேருந்துகள் மூலமாக நோய்த் தொற்று பரவமால் தடுக்கும் விதமாக, பேருந்துகளுக்கு கிருமி நாசினி தெளிக்கும் பணி தீவிரமாக்கப்பட்டுள்ளது. நோய்த் தொற்று தாக்கம் இல்லை என்கிற நிலை வரும் வரை இப்பணிகள் தொடா்ந்து மேற்கொள்ளப்படும் என்றனா்.