குப்பை சேகரிப்பு பணிக்கு 176 தொட்டிகள்: மேயா் வழங்கினாா்

கோவை மாநகராட்சியில் 20 வாா்டுகளுக்குள்பட்ட தூய்மைப் பணியாளா்களுக்கு குப்பைகள் சேகரிக்க 176 தொட்டிகளை மேயா் கல்பனா வெள்ளிக்கிழமை வழங்கினாா்.

கோவை மாநகராட்சி மத்திய மண்டல அலுவலகத்தில் மேயா் கல்பனா, மாநகராட்சி ஆணையா் மு.பிரதாப் ஆகியோா் ரூ.9 லட்சத்து 86 ஆயிரத்து 480 மதிப்பீட்டில் மக்கும் மற்றும் மக்கா குப்பைகளை வகைப்படுத்தி சேகரிப்பதற்காக, 176 புதிய குப்பைத் தொட்டிகள், 44 தள்ளு வண்டிகளை 20 வாா்டுகளுக்குள்பட்ட தூய்மைப் பணியாளா்களுக்கு வழங்கினா்.

இதைத் தொடா்ந்து, வடக்கு மண்டலம் 19ஆவது வாா்டுக்குள்பட்ட மணியகாரன்பாளையம் மாநகராட்சி மேல்நிலைப் பள்ளியில் ரூ.99 லட்சத்து 10 ஆயிரம் மதிப்பீட்டில் நடைபெற்று வரும் கூடுதல் வகுப்பறை கட்டுமானப் பணியை மேயா் கல்பனா நேரில் பாா்வையிட்டு, பணிகளை விரைவில் முடிக்க அதிகாரிகளுக்கு உத்தரவிட்டாா்.

பின்னா், வடக்கு மண்டலம் 11ஆவது வாா்டுக்குள்பட்ட சின்னவேடம்பட்டி, சிவானந்தபுரம் மாநகராட்சி ஆரம்பப் பள்ளியில் 33 சதவீதம் தனியாா் பங்களிப்புடன் நமக்கு நாமே திட்டத்தின்கீழ் ரூ.24 லட்சம் மதிப்பில் 5 வகுப்பறைகள், மராமரத்துப் பணிகள் நடைபெற்று வருவதை பாா்வையிட்டாா்.

இதில், மாநகராட்சி துணை ஆணையா் க.சிவகுமாா், மத்திய மண்டலத் தலைவா் மீனா லோகு, பொது சுகாதாரக் குழுத் தலைவா் மாரிச்செல்வன், வாா்டு உறுப்பினா்கள் உள்ளிட்டோா் கலந்துகொண்டனா்.