வால்பாறையில் சுற்றுலாப் பயணிகளை தாக்கிய காட்டெருமை

வால்பாறையில் இருசக்கர வாகனங்களில் சென்ற சுற்றுலாப் பயணிகளை சாலையோரம் நின்ற காட்டெருமை தாக்கியதால் பரபரப்பு ஏற்பட்டது.

வால்பாறைக்கு வேன், காா்களில் மட்டுமின்றி இருசக்கர வாகனங்களிலும் ஏராளமான சுற்றுலாப் பயணிகள் வந்து செல்கின்றனா். இவா்களில் பலா் வன விலங்குகளின் ஆபத்தை உணராமல் எஸ்டேட் பகுதிகளுக்கு சென்று வருகின்றனா்.

இந்நிலையில் வால்பாறையை அடுத்துள்ள சின்னக்கல்லாறு அருவிக்கு சுற்றுலாப் பயணிகள் காா் மற்றும் இருசக்கர வாகனத்தில் சின்கோனா 2 ஆவது டிவிஷன் சாலை வழியாக கடந்த செவ்வாய்க்கிழமை சென்று கொண்டிருந்துள்ளனா். அப்போது சாலையோரத்தில் இரண்டு காட்டெருமைகள் நின்று கொண்டிருந்தன. இதில் ஒரு காட்டெருமை சாலையின் குறுக்கே வந்து இருசக்கர வாகனத்தில் வந்தவா்களை முட்டி தள்ளி தாக்கியுள்ளது. அப்போது அவா்கள் வாகனத்தை கீழே போட்டுவிட்டு தப்பி ஓடினா். இருப்பினும் அதில் இருவருக்கு லேசான காயம் ஏற்பட்டு அரசு மருத்துவமனையில் சிகிச்சைக்கு பின் புறப்பட்டு சென்றனா்.