கத்தியைக் காட்டி மிரட்டி மதுக்கூட ஊழியரிடம் பணம் பறித்தவா் கைது

கோவையில் மதுக்கூட ஊழியரிடம் கத்தியைக் காட்டி மிரட்டி பணம் பறித்த இளைஞரை போலீஸாா் கைது செய்தனா்.

புதுக்கோட்டை மாவட்டம், சாரம்பக்குடி கிராமத்தைச் சோ்ந்தவா் பாண்டிராஜன் (39). இவா், கோவை புலியகுளம் பங்கஜா மில் சாலையில் அமைந்துள்ள தனியாா் மதுக்கூடத்தில் சப்ளையராக வேலை பாா்த்து வருகிறாா். புதன்கிழமை பிற்பகலில் மதுக்கூடத்தில் பாண்டிராஜன் பணியில் இருந்தபோது, அம்மன்குளம் பகுதியைச் சோ்ந்த வினோத் (35) அங்கு வந்து இலவசமாக மது தருமாறு கேட்டு தகராறு செய்துள்ளாா். பாண்டிராஜன் பணம் கொடுக்காமல் மது தர இயலாது எனக் கூறியதால் அவா்களுக்குள் வாக்குவாதம் ஏற்பட்டது. அப்போது அங்கு பணியாற்றும் சக ஊழியா்களும் வாடிக்கையாளா்களும் வினோத்தைத் தட்டிக் கேட்டதால், அங்கிருந்து சென்றாா்.

சிறிது நேரத்துக்குப் பிறகு பாண்டிராஜன் மதுக்கூடத்தின் வெளியே நின்று கொண்டிருந்தபோது அங்கு மீண்டும் வந்த வினோத், தான் வைத்திருந்த கத்தியை காட்டி மிரட்டி பணம் கேட்டுள்ளாா். பாண்டிராஜன் மறுக்கவே, அவரது சட்டைப் பையிலிருந்த ரூ. 1,150 ரொக்கத்தை வலுக்கட்டாயமாகப் பறித்துக் கொண்டு தப்பினாா்.

இதுதொடா்பாக ராமநாதபுரம் போலீஸாா் வழக்குப் பதிவு செய்து, வினோத்தைக் கைது செய்தனா்.