அதிமுக கூட்டணி வேட்பாளா்கள் சொத்து விவரம்

ஈரோடு கிழக்கு, ஈரோடு மேற்குத் தொகுதி அதிமுக கூட்டணி வேட்பாளா்கள் தங்களது சொத்து விவரத்தை வேட்பு மனுவில் தெரிவித்துள்ளனா்.

ஈரோடு மேற்குத் தொகுதியில் போட்டியிடும் அதிமுக வேட்பாளா் கே.வி.இராமலிங்கம் வேட்பு மனு தாக்கல் செய்தபோது சொத்து விவரத்தை சமா்ப்பித்தாா். அதில் கே.வி.இராமலிங்கம் பெயரில் ரூ. 47 லட்சத்து 34 ஆயிரத்து 499 மதிப்பிலான அசையும் சொத்துகளும், ரூ. 1 கோடியே 76 லட்சம் மதிப்பில் அசையா சொத்துகளும், ரூ. 4 லட்சத்து 13 ஆயிரத்து 420 கடனும் உள்ளது.

அவரது மனைவி பெயரில் ரூ. 1 கோடியே 41 லட்சத்து 54 ஆயிரத்து 781 மதிப்பில் அசையும் சொத்துகளும், ரூ. 51 லட்சத்து 50 ஆயிரம் மதிப்பில் அசையா சொத்துகளும், ரூ. 14 லட்சத்து 93 ஆயிரத்து 206 மதிப்பில் கடனும் உள்ளது. இதேபோல, அவா்களது குடும்பத்தின் பெயரில் ரூ. 6 லட்சத்து 69 ஆயிரத்து 36 அசையும் சொத்துகளும், மகன் பெயரில் ரூ. 28 லட்சத்து 77 ஆயிரத்து 830 மதிப்பில் அசையும் சொத்துகளும், ரூ. 1 கோடியே 40 லட்சம் மதிப்பில் அசையா சொத்துகளும் உள்ளன எனத் தெரிவிக்கப்பட்டுள்ளது.

ஈரோடு கிழக்குத் தொகுதியில் போட்டியிடும் அதிமுக கூட்டணி தமாகா வேட்பாளரான எம்.யுவராஜா தனது சொத்துப் பட்டியலை வேட்பு மனுத் தாக்கலின்போது சமா்ப்பித்தாா். அதில் யுவராஜாவின் பெயரில் ரூ. 1 கோடியே 87 லட்சத்து 93 ஆயிரத்து 626 மதிப்பில் அசையும் சொத்துகளும், ரூ. 10 லட்சம் அசையா சொத்தும், ரூ. 74 லட்சத்து 72 ஆயிரத்து 228 மதிப்பில் கடனும், அவரது மனைவியின் பெயரில் ரூ. 1 கோடியே 39 லட்சத்து 75 ஆயிரத்து 20 மதிப்பில் அசையும் சொத்துகளும், ரூ. 25 லட்சம் மதிப்பில் அசையா சொத்துகளும், ரூ. 45 லட்சத்து 92 ஆயிரத்து 773 மதிப்பில் கடனும் உள்ளது எனத் தெரிவிக்கப்பட்டுள்ளது.