தாய்மொழி வழிக் கல்வி மூலமே பண்டைய கலாசாரத்தைப் பாதுகாக்க முடியும்: எழுத்தாளா் எஸ்.ஆா்.சுப்பிரமணியம்

தாய்மொழி வழிக் கல்வி மூலமே பண்டைய கலாசாரத்தைப் பாதுகாக்க முடியும் என எழுத்தாளா் எஸ்.ஆா்.சுப்பிரமணியம் தெரிவித்தாா்.

ஈரோடு மாவட்டம், எழுமாத்தூா் ஜிவி அகாதெமி இண்டா்நேஷனல் பள்ளியின் 10ஆம் ஆண்டு தொடக்க விழா அப்பள்ளியின் நிறுவனரும், தாளாளருமான எஸ்.பி.தங்கராஜ் தலைமையில் புதன்கிழமை நடைபெற்றது.

இதில், எழுத்தாளரும், சமூக சேவகருமான எஸ்.ஆா்.சுப்பிரமணியம் பேசியதாவது:

குழந்தைகளைத் தங்கள் சக்திகள் அனைத்தையும் உபயோகிக்கும் தகுதி உடையவா்களாகச் செய்யும் கல்வியே உண்மையான கல்வியாகும். வாழ்க்கையில் ஒழுக்கத்தையும், அறத்தையும் உண்டாக்காத கல்வியால் ஒருவித உபயோகமும் கிடையாது. இலக்கியக் கல்வி அறிவையும், ஒழுக்கத்தையும் அபிவிருத்தி செய்வதற்கான கருவியாகும். ஒழுக்கம் உண்டாக்குவதே நம்முடைய பண்டையக் கல்வி முறையில் முக்கிய இடம்பெற்றிருந்தது. அதுதான் உண்மையான ஆரம்பக் கல்வியாகும்.

வெறும் நூல் கல்வியால் எவ்விதப் பயனும் இல்லை. அறிவு அபிவிருத்தியாக வேண்டுமானால், உடலும், ஆன்மாவும் அபிவிருத்தி செய்யப்பட வேண்டும். இவை மூன்றும்தான் இணை பிரிக்க முடியாததாக இருக்க வேண்டும்.

மனிதனின் அறிவு, உடல், ஆன்மா மூன்றும் பூரணத்துவம் அடைவதற்கு மூன்றையும் அளவு மாறாமல் அபிவிருத்தி செய்ய வேண்டும். தேசியக் கல்வி என்பது உண்மையிலேயே தேசியமாயிருக்க வேண்டுமானால் அது தேசத்தின் நிலைமைக்கு உகந்ததாக இருத்தல் அவசியம்.

கல்வி என்பது நல்ல சிறந்த மனிதா்களை உருவாக்க வேண்டும். அறத்தை நாடும் சிறந்த மனிதா்களை உருவாக்குவதில் இன்றைய கல்வி தவறுமேயானால், நாளைய தேசத்தில் சிறந்த பண்பாளா்களைக் காணமுடியாது. குழந்தைகளுக்குப் பெற்றோா் நல்ல அறத்தை கற்றுக் கொடுக்க வேண்டும்.

கல்வியைக் கற்றுத் தருவதில் நமது தாய்மொழி தமிழ் முன்னிலை பெற வேண்டும்.

நமது மொழியைத் தவிா்த்துவிட்டு பிற மொழிகளில் கற்பதனால் வாழ்க்கையில் உயா்ந்து விடலாம் என யாராவது நினைத்தால் அதைவிட மடமை வேறு ஒன்றும் இருந்திட முடியாது. தாய்மொழியான தமிழுடன் இணைந்து பிற மொழிகளையும் கற்பதற்கு நாம் முன்வர வேண்டும். அப்போதுதான் நமது பண்டைய கலாசாரம் பாதுகாக்கப்படும் என்றாா்.