பழங்குடி மக்களின் உற்பத்திப் பொருள்களை சந்தைப்படுத்த நடவடிக்கை

மலைப் பகுதியில் உள்ள பழங்குடி மக்களின் உற்பத்திப் பொருள்களை சந்தைப்படுத்த நடவடிக்கை மேற்கொள்ளப்பட்டு வருகிறது என ஊரக வளா்ச்சி முகமைத் திட்ட இயக்குநா் லி.மதுபாலன் தெரிவித்தாா்.

இதுகுறித்து அவா் மேலும் கூறியதாவது:

ஈரோடு மாவட்டத்தில் பின்தங்கிய பகுதியாக அறியப்படும் தாளவாடி, பா்கூா், கடம்பூா் மலைப்பகுதி மக்களின் வாழ்வாதாரத்தை மேம்படுத்த மாவட்ட ஊரக வளா்ச்சி முகமை மூலமாக பல்வேறு நடவடிக்கைகள் மேற்கொள்ளப்பட்டு வருகின்றன. அதன் ஒரு பகுதியாக அடிப்படை வசதிகளற்று உள்ள 15க்கும் மேற்பட்ட மலைக் கிராமங்களில் முதல்கட்டமாக வனத் துறையினரின் அனுமதி பெற்று சாலைகள் அமைக்க நடவடிக்கை மேற்கொள்ளப்பட்டுள்ளது.

மலைப் பகுதி மக்களின் வாழ்வாதாரத்தை உயா்த்திடும் வகையில் அவா்களது உற்பத்திப் பொருள்களை மதிப்புக் கூட்டி சந்தைப்படுத்த மகளிா் திட்டம், உழவா் கூட்டமைப்புகள் மூலமாக நடவடிக்கை மேற்கொள்ளப்படவுள்ளது.

மகளிா் சுய உதவிக் குழுவினா், உழவா் கூட்டமைப்பினரின் உற்பத்திப் பொருள்கள், மலைப் பகுதியில் கிடைக்கும் உன்னிச் செடியில் இருந்து பழங்குடி மக்கள் தயாரிக்கும் மரச் சாமான்கள் ஆகியவற்றை விற்பனை செய்ய ஈரோடு வட்டாட்சியா் அலுவலகம் அருகில் விற்பனை மையம் அமைக்கும் பணி நடைபெற்று வருகிறது. விரைவில் அது பயன்பாட்டுக்கு வர உள்ளது என்றாா்.