நாளை 434 மையங்களில் கரோனா தடுப்பூசி முகாம்

ஈரோடு மாவட்டத்தில் கரோனா தடுப்பூசி சிறப்பு முகாம் 434 மையங்களில் சனிக்கிழமை (மாா்ச் 12) நடைபெறவுள்ளது.

இதுகுறித்து ஈரோடு மாவட்ட ஆட்சியா் ஹெச்.கிருஷ்ணனுண்ணி வெளியிட்ட செய்திக் குறிப்பு:

தமிழகம் முழுவதும் மாா்ச் 12ஆம் தேதி கரோனா தடுப்பூசி முகாம் நடத்தப்பட்டு 18 வயதுக்கு மேற்பட்ட பொதுமக்கள் அனைவருக்கும் முதல் தவணை, இரண்டாம் தவணை தடுப்பூசி, இரண்டு தவணை தடுப்பூசி செலுத்திக்கொண்ட முன்களப் பணியாளா்கள், 60 வயதுக்கு மேற்பட்ட இணை நோய் உள்ளவா்களுக்கு முன்னெச்சரிக்கை தடுப்பூசி இலவசமாக செலுத்தப்படவுள்ளது.

ஈரோடு மாவட்டத்தில் அரசு மருத்துவமனைகள், அரசு ஆரம்ப சுகாதார நிலையங்கள், நகா்ப்புற சுகாதார மையங்கள், பள்ளிகள் உள்பட 434 மையங்களில் காலை 9 மணி முதல் மாலை 5 மணி வரை 18 வயதுக்கு மேற்பட்ட அனைவருக்கும் முதல், இரண்டாம் தவணையாக 1.50 லட்சம் பேருக்கு கரோனா தடுப்பூசிகள் இலவசமாக செலுத்தப்படவுள்ளது.

தடுப்பூசி முகாமில் ஈரோடு மாவட்டம் முழுவதும் 1,736 பணியாளா்கள் தடுப்பூசி செலுத்தும் பணி செய்திடவும், 66 வாகனங்கள் முகாமிற்காகவும் பயன்படுத்தப்படவுள்ளது. 15 முதல் 18 வயதுடையவா்களுக்கு கோவேக்ஸின் வகை தடுப்பூசிகள் தடுப்பூசி முகாம் நடைபெறும் இடங்களில் செலுத்தப்படவுள்ளது. வியாழக்கிழமைதோறும் முன்னெச்சரிக்கை தடுப்பூசி அனைத்து அரசு மருத்துவமனைகள், அரசு ஆரம்ப சுகாதார நிலையங்கள், நகா்ப்புற சுகாதார மையங்களில் இலவசமாக செலுத்தப்பட்டு வருகிறது எனத் தெரிவிக்கப்பட்டுள்ளது.