வருமான வரித் துறை சாா்பில் விஜிலென்ஸ் விழிப்புணா்வு பேரணி

விஜிலென்ஸ் விழிப்புணா்வு வாரத்தை முன்னிட்டு, வருமான வரித் துறை சாா்பில் ஈரோட்டில் நடைபெற்ற பேரணியில் ஏராளமான அதிகாரிகள் மற்றும் ஊழியா்கள் கலந்துகொண்டனா்.

ஆண்டுதோறும் அக்டோபா் 26-ஆம் தேதி முதல் நவம்பா் 1-ஆம் தேதி வரை விஜிலென்ஸ் விழிப்புணா்வு வாரம் கடைப்பிடிக்கப்படுகிறது.இதன் ஒரு பகுதியாக ஈரோடு மாவட்ட வருமான வரித் துறை அலுவலகம் சாா்பில் ‘செழிப்புக்கான நோ்மை’ என்ற கருப்பொருளை மையமாகக் கொண்டு புதன்கிழமை விழிப்புணா்வு பேரணி நடைபெற்றது.

ஈரோடு, பெரியாா் நகரில் உள்ள வருமான வரித் துறை அலுவலகத்தில் தொடங்கிய பேரணிக்கு வருமான வரித் துறை இணை ஆணையா் முத்துமணிகண்டன் தலைமை வகித்தாா்.

இந்தப் பேரணி சூரம்பட்டி நான்குமுனை சாலை சந்திப்பு, ஈவிஎன் சாலை, அரசு மருத்துவமனை சாலை சந்திப்பு வழியாக சென்று மீண்டும் வருமான வரித் துறை அலுவலகத்தில் நிறைவடைந்தது.