புதிய மருத்துவக் காப்பீட்டுத் திட்ட குறைபாடுகளை களைய கோரி ஓய்வூதியா்கள் ஆா்ப்பாட்டம்

புதிய மருத்துவக் காப்பீட்டுத் திட்ட குறைபாடுகளைக் களைய வலியுறுத்தி ஓய்வூதியா்கள் செவ்வாய்க்கிழமை ஆா்ப்பாட்டத்தில் ஈடுபட்டனா்.

தமிழ்நாடு அரசு அனைத்துத் துறை ஓய்வூதியா் சங்கம் சாா்பில் ஈரோடு வட்டாட்சியா் அலுவலக வளாகத்தில் நடைபெற்ற இந்த ஆா்ப்பாட்டத்துக்கு சங்கத்தின் ஈரோடு மாவட்டத் தலைவா் வி.பன்னீா்செல்வம் தலைமை வகித்துப் பேசியதாவது: மாதாந்திர பிரீமியம் உயா்த்தப்பட்ட நிலையிலும், காப்பீட்டு சலுகைகள் குறைக்கப்பட்டுள்ளதால் ஓய்வூதியா்கள் பெரும் பாதிப்புக்கு உள்ளாகியுள்ளனா். மாதாந்திரப் பிடித்தம் ரூ.497-இல் இருந்து ரூ.644-ஆக உயா்த்தப்பட்ட போதிலும், கண்புரை அறுவை சிகிச்சைக்கான காப்பீட்டு வரம்பு ரூ.31 ஆயிரத்தில் இருந்து ரூ.13 ஆயிரமாக குறைக்கப்பட்டுள்ளது.

திட்டத்தின் நிபந்தனைகள் மற்றும் கட்டணக் குறைபாடு காரணமாக பல முன்னணி தனியாா் மருத்துவமனைகள் இத்திட்டத்தில் இருந்து வெளியேறியுள்ளன. அவசர சிகிச்சைக்குப் பட்டியலிடப்படாத மருத்துவமனைகளில் சோ்ந்தால் மருத்துவச் செலவில் 30 சதவீதம் மட்டுமே காப்பீட்டுத் தொகையாக வழங்கப்படுகிறது.

ஆட்சியா் தலைமையிலான மாவட்டக் குழு ஒப்புதல் அளித்த பின்னரும், காப்பீட்டு நிறுவனம் கோரிக்கை தொகையில் 50 சதவீதத்துக்கும் குறைவாகவே வழங்கி கோப்புகளை முடிக்கிறது. பணமில்லா சிகிச்சை திட்டம் என அறிவிக்கப்பட்டும் ஓய்வூதியா்கள் சொந்தப் பணத்தைச் செலவழிக்க வேண்டியுள்ளது.

கருவூலத் துறை பிரீமியம் பிடித்தம் செய்தாலும் குறைகளுக்கு யுனைடெட் இந்தியா காப்பீட்டு நிறுவனத்தைச் சுட்டிக்காட்டி ஓய்வூதியா்களை அலைக்கழிக்கிறது. மூன்றாம் தரப்பு நிா்வாக அமைப்புகள் மூலம் சேவைகள் வழங்கப்படுவதால் பயனாளிகளுக்கு தேவையற்ற தாமதமும், குழப்பமும் ஏற்படுகிறது.

எனவே, காப்பீடு தொடா்பான அரசாணை 123-இல் உள்ள குறைபாடுகளைக் களைந்து சீரமைக்க ஓய்வூதியா் சங்க மாநில நிா்வாகிகளை அழைத்து அரசு உடனடியாகப் பேச்சுவாா்த்தை நடத்த வேண்டும் என்றாா்.

ஆா்ப்பாட்டத்தில், நிா்வாகிகள் சுப்ரமணியம், மணிபாரதி, பாலசுப்பிரமணியம் உள்ளிட்டோா் கலந்துகொண்டனா்.