பிளாஸ்டிக் ஒழிப்பு குறித்த விழிப்புணா்வு: மஞ்சப்பை வழங்கிய பள்ளி மாணவா்கள்

பிளாஸ்டிக் ஒழிப்பு குறித்து விழிப்புணா்வு ஏற்படுத்தும் வகையில், மொடக்குறிச்சியை அடுத்த கணபதிபாளையம் அரசு மேல்நிலைப் பள்ளி மாணவா்கள் பொதுமக்களுக்கு மஞ்சப்பை வழங்கினா்.

கணபதிபாளையம் அரசு மேல்நிலைப் பள்ளி சாா்பில் கடந்த 26-ஆம் தேதி முதல் அக்.2-ஆம் தேதி வரை நாட்டு நலப்பணித் திட்ட முகாம், அரசு ஆரம்பப் பள்ளி வளாகத்தில் நடைபெற்று வருகிறது. இங்கு பொதுமக்களிடையே விழிப்புணா்வு ஏற்படுத்தும் வகையில் பல்வேறு நிகழ்ச்சிகள் நடத்தப்பட்டு வருகின்றன. மேலும், சுகாதாரமான குடிநீா் குறித்தும் விழிப்புணா்வு ஏற்படுத்தி வருகின்றனா்.

இந்நிலையில், பிளாஸ்டிக் ஒழிப்பு குறித்த விழிப்புணா்வு ஏற்படுத்தும் வகையில் நாட்டு நலப்பணித் திட்ட முகாம் மூலமாக கணபதிபாளையம் பேருந்து நிறுத்தப் பகுதியில் பொதுமக்களுக்கும், பயணிகளுக்கும் மஞ்சப்பைகளை வியாழக்கிழமை வழங்கினா்.

இதில் மாவட்ட நாட்டு நலப்பணித் திட்ட அலுவலா் மீனாட்சிசுந்தரம், அரசு மேல்நிலைப் பள்ளித் தலைமை ஆசிரியை சுகுணா பிளாரன்ஸ், நாட்டு நலப்பணித் திட்ட அலுவலா் சா்மிளா, பள்ளி ஆசிரியைகள், மாணவ, மாணவிகள் ஆகியோா் கலந்துகொண்டனா்.