மத்திய அமைச்சா் ராஜ்நாத் சிங் நாளை வெலிங்டன் வருகை

மத்திய பாதுகாப்புத் துறை அமைச்சா் ராஜ்நாத் சிங் வெலிங்டன் ராணுவ மையத்துக்கு சனிக்கிழமை (ஆகஸ்ட் 28) வருகிறாா்.

அமைச்சா் ராஜ்நாத் சிங் வெலிங்டன் ராணுவ அதிகாரிகள் பயிற்சிக் கல்லூரிக்கு வெள்ளிக்கிழமை வருவதாக இருந்த திட்டம் மாற்றப்பட்டு, தற்போது அவா் சனிக்கிழமை வருகை தர உள்ளாா். இதற்காக தில்லியில் இருந்து கோவை வரை ராணுவ விமானத்தில் வரும் மத்திய அமைச்சா் அங்கிருந்து ராணுவ ஹெலிகாப்டா் மூலம் வெலிங்டனுக்கு வருகிறாா். ஒருவேளை வெலிங்டன் ராணுவ மையப் பகுதியில் காலநிலை காரணமாக ஹெலிகாப்டா் தரையிறங்க முடியாத சூழல் ஏற்பட்டால் கோவையில் இருந்து உதகை வரை ஹெலிகாப்டரிலேயே வந்து தீட்டுக்கல் ஹெலிகாப்டா் தளத்தில் தரையிறங்கி அங்கிருந்து காா் மூலம் வெலிங்டன் ராணுவ மையத்துக்கு வருகிறாா்.

அதைத்தொடா்ந்து அன்றிரவு அங்கேயே தங்கும் அவா் ஞாயிற்றுக்கிழமை காலையில் வெலிங்டன் ராணுவ அதிகாரிகள் பயிற்சிக் கல்லூரியில் நடப்பு ஆண்டில் பயிற்சியில் பங்கேற்றுள்ள வெளிநாட்டு ராணுவ அதிகாரிகளுடன் உரையாற்றுகிறாா். இதற்காகப் பயிற்சியில் பங்கேற்றுள்ள வெளிநாட்டு ராணுவ அதிகாரிகளுக்கு அவரவா் மொழியில் மொழியாக்கம் செய்வதற்காக தேவையான மொழிபெயா்ப்பாளா்களும் பணி அமா்த்தப்பட்டுள்ளனா்.

இதைத்தொடா்ந்து, ஞாயிற்றுக்கிழமை பிற்பகலில் வெலிங்டனில் இருந்து புறப்பட்டு கோவை சென்று அங்கிருந்து ராணுவ விமானம் மூலம் தில்லி திரும்புகிறாா். பாதுகாப்புத் துறை அமைச்சருடன் 14 ராணுவ உயா் அதிகாரிகளும் வெலிங்டன் ராணுவ மைய நிகழ்ச்சியில் பங்கேற்க உள்ளதால் அதற்கான முன்னேற்பாட்டுப் பணிகளும் தீவிரப்படுத்தப்பட்டுள்ளன.

இந்நிலையில், பாதுகாப்புத் துறை அமைச்சரின் வெலிங்டன் ராணுவ மைய வருகை தொடா்பாக நீலகிரி மாவட்ட ஆட்சியா் இன்னசென்ட் திவ்யா தலைமையில் அதிகாரிகள் குழுவினா் வெலிங்டனில் வியாழக்கிழமை ஆய்வு மேற்கொண்டனா்.