ஆம் ஆத்மி கட்சியினர் நூதனப் போராட்டம்

திருப்பூர் மாவட்ட ஆட்சியர் அலுவலகத்தில் வழங்கப்படும் மனுக்களுக்கு நடவடிக்கை எடுக்கப்படாததைக் கண்டித்து ஆம் ஆத்மி கட்சியினர், பொதுமக்களுக்கு அல்வா கொடுக்கும் போராட்டத்தில் திங்கள்கிழமை ஈடுபட்டனர்.

திருப்பூர் மாவட்ட ஆட்சியர் அலுவலகத்தில் வாரந்தோறும் மக்கள் குறைதீர்க் கூட்டம் நடைபெற்று வருகிறது. இந்தக் கூட்டத்தில் நூற்றுக்கணக்கான பொதுமக்கள் அடிப்படை வசதி உள்ளிட்ட பல்வேறு கோரிக்கைகளை வலியுறுத்தி மனு அளிக்கின்றனர். ஆனால், இவ்வாறு பெறப்படும் பல மனுக்கள் மீது அதிகாரிகள் நடவடிக்கை எடுப்பதில்லை.

இதனால், பொதுமக்கள் மிகுந்த ஏமாற்றத்துக்குள்ளாகி வருகின்றனர். மாவட்ட நிர்வாகத்தின் இச்செயலைக் கண்டித்து பொதுமக்களுக்கு அல்வா வழங்கும் போராட்டத்தில் ஈடுபட்டுள்ளதாக ஆம் ஆத்மி கட்சியினர் தெரிவித்தனர். இந்தப் போராட்டத்தினால் ஆட்சியர் அலுவலக வளாகத்தில் சிறிது நேரம் பரபரப்பு ஏற்பட்டது.