திருப்பூர் நீதிமன்றத்தில் மாவோயிஸ்ட் தம்பதி ஆஜர்

போலி ஆவணங்களைப் பயன்படுத்தி சிம்கார்டு வாங்கிய வழக்கில் மாவோயிஸ்ட் தம்பதி திருப்பூர் நீதிமன்றத்தில் புதன்கிழமை ஆஜர்படுத்தப்பட்டனர்.
கோவை மாவட்டம், கருமத்தம்பட்டியில்  2015 மே 4ஆம்  தேதி மாவோயிஸ்ட் இயக்கத்தைச் சேர்ந்த ஆர்.ரூபேஷ், இவரது மனைவி சைனா, அனூப், கண்ணன், வீரமணி ஆகிய 5 பேரை கியூ பிரிவு போலீஸார் கைது செய்து கோவை மத்திய சிறையில் அடைத்தனர். இதில்,  ரூபேஷ், சைனா இருவரும் திருப்பூரில் தங்கியிருந்தபோது போலி ஆவணங்களைப் பயன்படுத்தி சிம்கார்டு வாங்கியதாக அளிக்கப்பட்ட புகாரின் அடிப்படையில் திருப்பூர் மாநகர வடக்கு போலீஸார் இந்தத் தம்பதி மீது பல்வேறு பிரிவுகளில் வழக்குகளைப் பதிவு செய்தனர்.
இந்த வழக்குகள் திருப்பூர் முதன்மை மாவட்ட நீதிமன்றத்தில் விசாரிக்கப்படுகின்றன. திருப்பூர் முதன்மை மாவட்ட நீதிமன்ற நீதிபதி அல்லி முன்னிலையில் மாவோயிஸ்ட் தம்பதி ரூபேஷ், சைனா ஆகியோர் நீதிமன்றத்தில் புதன்கிழமை ஆஜர்படுத்தப்பட்டனர். இந்த வழக்கை வரும் 31ஆம் தேதிக்கு ஒத்திவைத்து நீதிபதி உத்தரவிட்டார். இதையடுத்து தம்பதியர் கோவை மத்திய சிறைக்கு அழைத்துச் செல்லப்பட்டனர்.