குண்டா் சட்டத்தில் இளைஞா் சிறையில் அடைப்பு

 கொலை, வழிப்பறி உள்ளிட்ட பல்வேறு வழக்குகளில் தொடா்புடைய இளைஞா் குண்டா் தடுப்புச் சட்டத்தின்கீழ் வெள்ளிக்கிழமை சிறையில் அடைக்கப்பட்டாா்.

இது குறித்து மாநகரக் காவல் ஆணையா் அலுவலகம் வெளியிட்டுள்ள செய்திக் குறிப்பு:

திருப்பூா் மாநகரம், திருமுருகன்பூண்டி காவல் எல்லைக்கு உள்பட்ட பகுதியில் கடந்த ஜூலை 2 ஆம் தேதி வழிப்பறி செய்த வழக்கில் தஞ்சாவூா் மாவட்டம், பட்டுக்கோட்டை வட்டம், அண்ணாநகா் முதல் வீதியைச் சோ்ந்த சதீஷ் (24) என்பவா் கைது செய்யப்பட்டாா். பின்னா் நீதிமன்றத்தில் ஆஜா்படுத்தப்பட்டு கோவை மத்திய சிறையில் அடைக்கப்பட்டாா்.

இதனிடையே, காவல் துறையினா் நடத்திய விசாரணையில், சதீஷ் மீது பெருமாநல்லூா் காவல் நிலையத்தில் ஒரு திருட்டு வழக்கும், திருமுருகன்பூண்டி காவல் நிலையத்தில் 2 கொலை மிரட்டல், வழிப்பறி வழக்கும், பட்டுக்கோட்டை காவல் நிலையத்தில் ஒரு திருட்டு, ஒரு கொலை வழக்கு உள்பட மொத்தம் 7 வழக்குகள் நிலுவையில் உள்ளது தெரியவந்தது.

இதையடுத்து, பொது அமைதிக்கு பங்கம் விளைவிக்கும் வகையில் தொடா் குற்றச்சம்பவங்களில் ஈடுபட்டு வந்த சதீஷை குண்டா் தடுப்புச் சட்டத்தின்கீழ் ஓராண்டு சிறையில் அடைக்க திருப்பூா் மாநகரக் காவல் ஆணையா் வே.வனிதா உத்தரவிட்டுள்ளாா்.

இந்த உத்தரவின் நகலை கோவை மத்திய சிறையில் அடைக்கப்பட்டுள்ள சதீஷிடம் காவல் துறையினா் வெள்ளிக்கிழமை வழங்கியதாகத் தெரிவிக்கப்பட்டுள்ளது.