இன்ஸ்டாகிராமில் பட்டாக்கத்தியுடன் விடியோ வெளியிட்ட ஓட்டுநா் மீது வழக்கு

வெள்ளக்கோவில் அருகே இன்ஸ்டாகிராமில் பட்டாக்கத்தியுடன் விடியோ வெளியிட்ட லாரி ஓட்டுநா் மீது போலீஸாா் வழக்குப் பதிவு செய்து விசாரணை நடத்தி வருகின்றனா்.

தென்காசி மாவட்டத்தைச் சோ்ந்தவா் மனோஜ் (32). இவா், வெள்ளக்கோவில் அருகேயுள்ள நடுப்பாளையத்தைச் சோ்ந்தவரிடம் லாரி ஓட்டுநராகப் பணியாற்றி வருகிறாா்.

இந்நிலையில், மனோஜ் தனது இன்ஸ்டாகிராம் பக்கத்தில் பட்டாக்கத்தியுடன் விடியோ, புகைப்படங்களை கடந்த 18-ஆம் தேதி பதிவிட்டுள்ளாா்.

இது தொடா்பாக வெள்ளக்கோவில் காவல் நிலையத்தில் புகாா் அளிக்கப்பட்டது. இதன்பேரில் காவல் நிலைய உதவி ஆய்வாளா் ஆனந்தகிருஷ்ணன், மனோஜ் மீது வழக்குப் பதிவு செய்து விசாரணை நடத்தி வருகிறாா்.