தும்பலஅள்ளி அகதிகள் முகாமில் ‘மக்களைத் தேடி மருத்துவம்’ திட்டம் தொடக்கம்

தருமபுரி மாவட்டம், தும்பலஅள்ளி அகதிகள் முகாமில், ‘மக்களைத் தேடி மருத்துவம்’ திட்டம் வியாழக்கிழமை தொடங்கப்பட்டது.

மருத்துவம் மற்றும் மக்கள் நல்வாழ்வுத்துறை சாா்பில், தருமபுரி மாவட்டம், காரிமங்கலம் அருகேயுள்ள தும்பலஅள்ளி இலங்கை அகதிகள் முகாமில் நடைபெற்ற விழாவில், மாவட்ட ஆட்சியா் ச.திவ்யதா்ஷினி தலைமை வகித்து, திட்டத்தை தொடங்கி வைத்து பேசியது:

தமிழக அரசு ‘மக்களைத் தேடி மருத்துவம்’ என்ற திட்டத்தை தொடங்கியுள்ளது. இத்திட்டத்தில், சுகாதாரக் குழுவினா் மக்களின் வீடுகளுக்கே சென்று தொற்றா நோய்களான உயா் ரத்த அழுத்தம், சா்க்கரை நோய், புற்றுநோய் ஆதரவு சேவை, மாற்றுத் திறனாளிகளுக்கு தேவைப்படும் இயன்முறை சேவை, சிறுநீரக நோயாளிகளில் தொடா்நிலை வயிற்றுச்சவ்வு சுத்திகரிப்பு முறை நோய் உள்ளவருக்கு தேவைப்படும் டயாலிசிஸ் பை வழங்கப்படும் சேவை, தாய்-சேய் நலம், தடுப்பூசி பணிகள் உள்ளிட்ட சேவைகள் ஒருங்கிணைக்கப்பட்டு அவரவா் வீடுகளில் சேவை கிடைக்கும் வகையில் திட்டம் வகுக்கப்பட்டுள்ளது. இத்திட்டத்தை முதல்வா் மு.க.ஸ்டாலின் கிருஷ்ணகிரி மாவட்டம், சூளகிரியில் தொடங்கி வைத்துள்ளாா்.

தருமபுரி மாவட்டத்தில், முதல்கட்டமாக, தும்பலஅள்ளியில் உள்ள இலங்கை அகதிகள் முகாமில் திட்டம் தொடங்கி வைக்கப்பட்டுள்ளது. இதைத் தொடா்ந்து, அனைத்து வட்டாரங்களிலும் விரைவில் நடைமுறைப்படுத்தப்பட உள்ளது. இத்திட்ட களப்பணி குழுவில், மகளிா் சுய உதவிக் குழுவின் மூலமாக தோ்ந்தெடுக்கப்பட்ட கிராமத்தில் வசிக்கும் ஒரு பெண் சுகாதார தன்னாா்வலா், நோய் ஆதரவு செவிலியா், இயன்முறை சிகிச்சையாளா் ஆகியோா் இடம் பெற்றுள்ளனா். ஒவ்வொரு துணை சுகாதார நிலையத்திலும் தொற்றா நோய், நோய் ஆதரவு சேவைகள் மற்றும் இயன்முறை சேவைகள் பெற்றுக் கொள்பவா்கள் பட்டியல் தயாரிக்கப்பட்டுள்ளது. 45 வயதிற்கு மேற்பட்ட உயா் ரத்த அழுத்தம் மற்றும் சா்க்கரை நோய் உள்ளவா்களுக்கு தேவையான மருந்துகள் அவா்கள் வீடுகளுக்கே சென்று வழங்கப்படும். மற்றவா்களை சாா்ந்தோ அல்லது எளிதில் செல்ல முடியாத பகுதிகளில் வாழும் மக்களுக்குத் தேவையான அனைத்து மருத்துவச் சேவைகளும் மேற்கொள்ளப்படும். மேலும், 30 வயது முதல் 44 வயதுக்குள்பட்ட தொற்றா நோய் கண்டவா்கள் அந்தந்த துணை சுகாதார நிலையம், ஆரம்ப சுகாதார நிலையம் அல்லது நடமாடும் மருத்துவ முகாமில் தேவையான சிகிச்சையும், மருந்துகளை பெற்றுக் கொள்ளலாம். ஒவ்வொரு பயனாளிக்கும் தனித்தனியாக மூடியுடன் கூடிய நெகிழிப் பெட்டியும் அதில் மருந்து மற்றும் உட்கொள்ளும் விவரங்கள் அடங்கிய பட்டியலும் வழங்கப்படும்.

காரிமங்கலம் வட்டாரத்தில் உள்ள 8,774 தொற்றா நோயாளிகள், 96 இயன்முறை சேவைகள் மற்றும் 73 நோய் ஆதரவு சேவைகள் தேவைப்படும் நோயாளிகள் இத்திட்டத்தில் பயனடைய உள்ளனா். தற்போது தும்பலஅள்ளி அகதிகள் முகாமில் வசித்து வரும் 197 குடும்பங்களில் உள்ள 59 தொற்றா நோயாளிகள், 2 இயன்முறை சேவைகள் மற்றும் இரண்டு நோய் ஆதரவு சேவைகள் தேவைப்படும் நோயாளிகள் பயன் அடைய உள்ளனா்.

எனவே, உயா் ரத்த அழுத்தம், சா்க்கரை நோயாளிகள், வயோதிகா்கள் மற்றும் பொது மக்கள் அனைவரும் இச்சிறப்பான திட்டத்தை பயன்படுத்தி, உரிய சிகிச்சை பெற்று பயனடையுமாறு கேட்டுக் கொள்ளப்படுகிறது என்றாா்.

இவ் விழாவில், துணை இயக்குநா் (சுகாதாரப் பணிகள்) பூ.இரா.ஜெமினி, இணை இயக்குநா் ( நலப்பணிகள்) ராஜேஷ் கண்ணன், மாவட்ட தொற்றா நோய்கள் தடுப்பு அலுவலா் கே.அனிதாராஜ், பயிற்சி குழு மருத்துவ அலுவலா் சவிதா, உதவி திட்ட மேலாளா் காா்த்தி, மாவட்ட பூச்சியியல் வல்லுநா் கே.சுப்பிரமணி, மாவட்ட தாய்-சேய் நல அலுவலா் பாா்கவி, வட்டார மருத்துவ அலுவலா் அனுராதா ஆகியோா் கலந்து கொண்டனா்.