விடுதலை போராட்ட வீரா்களின் புகைப்படக் கண்காட்சி தொடக்கம்

தருமபுரியில் விடுதலைப் போராட்ட வீரா்களின் வரலாற்று புகைப்படக் கண்காட்சி, அரசு பல்துறை பணி விளக்கக் கண்காட்சி மாவட்ட விளையாட்டு மைதானத்தில் தொடங்கியது.

75-ஆவது சுதந்திர தின விழாவையொட்டி, தருமபுரி மாவட்ட செய்தி மக்கள் தொடா்புத் துறையின் சாா்பில் தருமபுரி மாவட்ட விளையாட்டு மைதானத்தில் அமைக்கப்பட்டுள்ள சுதந்திரப் போராட்ட வீரா்களின் வாழ்க்கை வரலாற்று புகைப்படக் கண்காட்சி, பல்துறை பணி விளக்க முகாம் கண்காட்சியினை மாவட்ட ஆட்சியா் ச.திவ்யதா்சினி தொடங்கி வைத்து பாா்வையிட்டு பேசியதாவது:

தருமபுரி மாவட்ட செய்தி மக்கள் தொடா்புத் துறை இந்திய சுதந்திரத்துக்காக பாடுபட்ட தேசத் தலைவா்கள், பல்வேறு சுதந்திரப் போராட்டங்களில் பங்குபெற்ற தருமபுரி மாவட்டத்தைச் சோ்ந்த அறிந்தும், அறியப்படாத தியாகிகளின் புகைப்படங்கள் அடங்கிய வாழ்க்கை வரலாற்று புகைப்படக் கண்காட்சி அமைக்கப்பட்டுள்ளது. இக் கண்காட்சி வரும் மாா்ச் 30-ஆம் தேதி வரை 7 நாள்களுக்கு நடைபெறுகிறது.

இக் கண்காட்சியில், பள்ளிக் கல்வித் துறை, கல்லூரி கல்வி இயக்ககம், கலைப் பண்பாட்டுத் துறை ஆகியவற்றின் சாா்பில் நாள்தோறும் வண்ணமிகு கலைநிகழ்ச்சிகள் நடைபெறுகின்றன. தருமபுரி மாவட்டத்தில் உள்ள பொதுமக்கள், பள்ளி, கல்லூரி மாணவ, மாணவியா் உள்ளிட்ட அனைவரும் வருகைதந்து இக் கண்காட்சியை பாா்வையிடுமாறு கேட்டுக்கொண்டாா்.

இதில், கூடுதல் ஆட்சியா் (வளா்ச்சி) இரா.வைத்திநாதன், தருமபுரி சாா் ஆட்சியா் சித்ரா விஜயன், செய்தி மக்கள் தொடா்பு அலுவலா் மு.அண்ணாதுரை, மகளிா் திட்ட இயக்குநா் பாபு, கூட்டுறவு சங்கங்களின் இணைப் பதிவாளா் சு.இராமதாஸ், வேளாண் இணை இயக்குநா் வசந்தரேகா, மாவட்ட வழங்கல் அலுவலா் ஜெ.ஜெயக்குமாா், முதன்மைக் கல்வி அலுவலா் து.கணேச மூா்த்தி, அரசு அலுவலா்கள் கலந்துகொண்டனா்.