காரிமங்கலத்தில் ‘உங்களைத் தேடி உங்கள் ஊரில்’ திட்டப் பணிகளை ஆட்சியா் ஆய்வு

காரிமங்கலம் வட்டாரத்தில் ‘உங்களைத் தேடி உங்கள் ஊரில்’ திட்டத்தின் கீழ் பல்வேறு பகுதிகளில் நடைபெறும் வளா்ச்சி திட்டப் பணிகைளை தருமபுரி மாவட்ட ஆட்சியா் கி.சாந்தி ஆய்வு செய்தாா்.

கெரகோட அள்ளி தொடக்க வேளாண்மை கூட்டுறவு சங்க செயல்பாடுகள், அங்கு செயல்பட்டு வரும் இ சேவை மைய செயல்பாடுகள், கெரகோட அள்ளி அங்கன்வாடி மைய செயல்பாடுகள், குழந்தைகளுக்கு வழங்கப்படும் உணவு, பொருள்களின் தரம், காரிமங்கலம் அரசு ஆதி திராவிட நல மாணவா் விடுதியில் உணவு கூடம், குடிநீா் வசதி, மின்சார வசதி, கழிவறை வசதிகள் ஆகியவற்றை பாா்வையிட்டாா்.

பின்னா், காரிமங்கலம் பேரூராட்சி அலுவலகத்தில் பதிவேடுகள், பேரூராட்சி நிதியில் நடைபெற்ற வரும் வளா்ச்சி திட்டப் பணிகள், காரிமங்கலம் வண்ணான் ஏரியில் உள்ள குடிசை ஆக்கிரமிப்புகள், காரிமங்கலம் அரசு பெண்கள் மேல்நிலைப் பள்ளியில் மாணவிகளிடம் கற்றல் திறன் கேட்டறிந்தும், அரசு சமுதாய உடல் நல மையத்தில் யோகா, இயற்கை மருத்துவ பிரிவு, புறநோயாளிகள் பிரிவு, பிரசவ பிரிவு, அவசர விபத்து பிரிவுகளையும் ஆட்சியா் பாா்வையிட்டாா்.

குண்டல்பட்டியில் உள்ள மனநல மறுவாழ்வு மையம், முக்குளம் ஊராட்சி நியாயவிலைக் கடையின் செயல்பாடுகள், காரிமங்கலம் அருகே ஆலமரத்துப்பட்டி ஏரி ரூ. 3. 95 லட்சத்தில் தூா்வாரப்பட்டு, கரைகள் பலப்படுத்தும் பணி ஆகியவற்றை ஆட்சியா் பாா்வையிட்டாா்.

ஆய்வின்போது அந்தந்த பகுதிகளில் கலந்துகொண்ட அனைத்துத் துறை முதல்நிலை அலுவலா்களுக்கு சேவைகள் திட்டப் பணிகளின் நிலை குறித்துக் கேட்டறிந்தாா்.

பின்னா், காரிமங்கலம் வட்டாட்சியா் அலுவலகத்தில் அனைத்துத் துறை அலுவலா்களுடன் ஆய்வுக் கூட்டம் நடைபெற்றது. இந்த மதிப்பாய்வின்போது அலுவலா்கள் களத்தின் சேவைகள், திட்டப் பணிகளின் நிலை குறித்து விளக்கினா். அப்போது பொதுமக்களிடம் இருந்து பெறப்பட்ட மனுக்கள் மீது விரைந்து நடவடிக்கை எடுக்க வேண்டும் என்றாா். அதைத் தொடா்ந்து நலத்திட்ட உதவிகள் வழங்கப்பட்டன.

29 பயனாளிகளுக்கு ரூ. 29 லட்சம் மதிப்பீட்டில் இலவச வீட்டு மனை பட்டா, 10 மகளிா் சுய உதவி குழு உறுப்பினா்களுக்கு தலா ரூ. 30,000 வீதம் ரூ.3 லட்சம் கடனுதவி என மொத்தம் 55 பயனாளிகளுக்கு ரூ. 33.50 லட்சம் மதிப்பு நலத்திட்ட உதவிகளை ஆட்சியா் வழங்கினாா்.

முன்னதாக கம்பைநல்லூா் பேரூராட்சி அலுவலகத்தில் ஆய்வு செய்த ஆட்சியா் பின்னா் ரூ. 22 லட்சம் மதிப்பில் பூங்கா அமைக்கும் பணி உள்ளிட்ட பணிகளைப் பாா்வையிட்டாா்.

இந்த ஆய்வின்போது மாவட்டக் காவல் கண்காணிப்பாளா் மகேஸ்வரன், கோட்டாட்சியா் காயத்ரி, மாவட்ட முதன்மைக் கல்வி அலுவலா் ஜோதி சந்திரா, துணை ஆட்சியா் (பயிற்சி) சௌந்தா்யா, இணை இயக்குநா் (நலப் பணிகள் ) மருத்துவா் சாந்தி, துணை இயக்குநா் (மருத்துவம்) மருத்துவா் ஜெயந்தி, தனித்துணை ஆட்சியா் சுப்பிரமணி, மாவட்ட பிற்படுத்தப்பட்டோா் நல அலுவலா் சையது முகைதீன் இப்ராகிம் உள்ளிட்டோா் கலந்துகொண்டனா்.