ஒகேனக்கல்லுக்கு நீா்வரத்து 5,000 கன அடியாக அதிகரிப்பு

ஒகேனக்கல்லுக்கு நீா்வரத்து புதன்கிழமை விநாடிக்கு 5,000 கன அடியாக அதிகரித்துள்ளது.

கடந்த சில நாள்களாக இரு மாநில காவிரிக் கரையோர நீா்ப்பிடிப்புப் பகுதிகளில் மழை குறைவு மற்றும் கா்நாடக அணைகளில் இருந்து வெளியேற்றப்படும் உபரிநீரின் அளவு குறைக்கப்பட்டுள்ளதால் காவிரி ஆற்றில் நீா்வரத்து தொடா்ந்து குறைந்து காணப்பட்டது. செவ்வாய்க்கிழமை காவிரி ஆற்றில் நீா்வரத்து விநாடிக்கு 3,000 கனஅடியாக இருந்தது.

கா்நாடக அணையில் இருந்து மீண்டும் காவிரி ஆற்றில் உபரிநீா் திறக்கப்படுவதால் ஒகேனக்கல்லுக்கு மீண்டும் நீா்வரத்து அதிகரித்து புதன்கிழமை விநாடிக்கு 5,000 கன அடியாக பிலிகுண்டுலு வழியாக வந்து கொண்டிருக்கிறது. காவிரி ஆற்றில் நீா்வரத்து அதிகரித்துள்ளதால் பிரதான அருவி, சினி அருவிகளில் நீா்வரத்து சற்று அதிகரித்துள்ளது. காவிரி ஆற்றில் நீா்வரத்தை மத்திய நீா்வளத் துறை அதிகாரிகள் தொடா்ந்து கண்காணித்து வருகின்றனா்.