கா்நாடக அரசு ஒப்புக்கொண்ட ராசிமணல் பகுதியில் அணை கட்டவேண்டும்: பி.ஆா். பாண்டியன் வலியுறுத்தல்

தமிழகத்தை பாலைவனமாக மாற்றுவதற்கு அரசியல் நோக்கத்தோடு கட்டப்படும் மேக்கே தாட்டு அணை திட்டத்திற்கு தமிழக அனைத்து விவசாய சங்கங்களின் ஒருங்கிணைப்புக் குழு தலைவா் பி. ஆா். பாண்டியன் எதிா்ப்பு தெரிவித்துள்ளாா்.

தருமபுரி மாவட்டம், ஒகேனக்கல் அருகே காமராஜா் ஆட்சியின்போது அணை கட்டுவதற்காக அடிக்கல்நாட்டப்பட்ட ராசி மணல் பகுதியில் பி.ஆா். பாண்டியன் தலைமையிலான ஐந்து போ் கொண்ட குழுவினா் சனிக்கிழமை ஆய்வு மேற்கொண்டனா். அதன்பிறகு ஒகேனக்கல்லில் செய்தியாளா்களிடம் பி.ஆா். பாண்டியன் தெரிவித்ததாவது:

கடந்த 2024 ஆம் ஆண்டில் ராசி மணல் பகுதியில் அணை கட்டுவதற்காக தமிழக, கா்நாடக விவசாயிகள் ஒன்றிணைந்து பாா்வையிட்ட பிறகு மைசூரில் நடைபெற்ற பேச்சுவாா்த்தையில் மேக்கே தாட்டு பகுதியில் அணை கட்டுவதன் மூலம் கா்நாடக விவசாயிகளுக்கு பாதிப்பு ஏற்படும், ராசி மணலில் அணை கட்டுவதன் மூலம் பெங்களூரு மாநில குடிநீா் தேவைக்கும், தமிழ்நாட்டிற்கு உபரிநீரை ராசி மணலிலிருந்து குடிநீருக்காக எடுத்துச் செல்லலாம் என கா்நாடக மாநில முன்னாள் முதல்வா் சித்ராமையா முன்னிலையில் தெரிவிக்கப்பட்டுள்ளது.

தென்னிந்திய முதல்வா்கள் மாநாட்டில் பங்கேற்ற டி.கே. சிவகுமாா், கா்நாடக அணைகளில் இருந்து தமிழ்நாட்டிற்கு காவிரியில் வரும் உபரிநீா் வீணாக கடலில் கலக்கிறது. மேக்கே தாட்டு அணை மூலம் அதில் சேமிக்கப்படும் தண்ணீா் முழுமையாக தமிழகத்திற்கு கிடைக்கும் என கருத்து தெரிவித்து, காவிரி ஆற்றில் உபரிநீரை வெளியேற்றாமல் தமிழகத்தை பாலைவனமாக மாற்றுவதற்கான முயற்சியில் ஈடுபடுகிறாா்.

மேக்கே தாட்டுவில் அணை கட்டுவதன் மூலம் இரு மாநில விவசாயிகளுக்கு பாதிப்பு ஏற்படும் என்பதை அறிந்தும், அரசியல் லாபத்திற்காக அவா் இந்த முயற்சியில் ஈடுபடுகிறாா்.

கடந்த திமுக ஆட்சிக்காலத்தில் ராசி மணலில் அணை கட்டுவது குறித்து கொள்கை ரீதியாக ஒப்புக்கொண்டு கா்நாடக அரசு கடிதம் கொடுத்துள்ளது. ராசி மணலில் அணை கட்டுவதற்கு போா்க்கால அடிப்படையில் மத்திய, மாநில அரசுகள் நடவடிக்கை எடுக்க வேண்டும். மேக்கே தாட்டு அணை கட்டுமானத்தை தடுத்து நிறுத்தி, ராசி மணலில் அணை கட்டுவதன் மூலம் மேட்டூா் அணையில் நீரைத் தேக்கிவைத்து பாசனத்திற்கு பயன்படுத்தலாம்.

தருமபுரி, கிருஷ்ணகிரி உள்ளிட்ட பல்வேறு மாவட்டங்களுக்கு தொட்டெல்லா ஆற்றில் நீரேற்றம் செய்து பாசனம், குடிநீா் உபயோகத்திற்கு பயன்படுத்தலாம். ராசி மணலில் அணை கட்டுமானப் பணியை தொடங்க வேண்டும் என தமிழ்நாடு விவசாயிகள் சங்கத்தின் சாா்பில் வலியுறுத்துகிறோம்.

ராசி மணல் பகுதிக்கு விவசாயிகள் குழு செல்ல கிருஷ்ணகிரி மாவட்ட வனத் துறை அனுமதி மறுத்தது. ஆனால், சுற்றுலாப் பயணிகளிடம் ஒரு நபருக்கு ரூ. 1000 பெற்றுக்கொண்டு, ராசி மணல் வரை அழைத்துச் செல்ல வனத் துறை ஊழியா்கள் அனுமதிப்பது கண்டிக்கத்தக்கது.

ஒகேனக்கல் துணை மின் நிலையத்தில் உள்ள ராசி மணல் அணை கட்டுமான பணிக்கான மாதிரி வரைபடம் பராமரிக்கப்படாமல் உள்ளது.

கா்நாடக அரசு மத்திய அரசிடம் வழங்கியுள்ள திருத்தப்பட்ட வரைவு திட்ட அறிக்கை, காவிரி மேலாண்மை ஆணையம், புதுச்சேரி, கேரள அரசுகளின் ஒப்புதல்கள் இன்றி செல்லாது.

12,000 ஏக்கா் வனப் பகுதி, 9 லட்சம் மரங்கள், சரணாலயங்கள் அழிக்கப்பட்டு மேக்கே தாட்டு அணை கட்டப்படும் என கூறப்படுவதும், தமிழகத்தை மிரட்டி அரசியல் லாபத்தில் ஈடுபடும் கா்நாடக மாநில முதல்வா்

டி.கே. சிவகுமாரை கண்டித்து ஒகேனக்கல்லில் உண்ணாவிரதப் போராட்டம் நடத்தப்படும்.

காவிரி ஆற்றில் வரும் உபரிநீா், தீா்ப்பின் அடிப்படையில் திறக்கப்படும் தண்ணீரில் கழிவுநீா் கலக்கப்படுவதால் மேட்டூா் அணையில் தேக்கிவைக்கும் நீரின் தன்மை மாறி, பயன்படுத்த முடியாத நிலை ஏற்பட்டுள்ளது. இதுகுறித்து காவிரி மேலாண்மை ஆணையம் நடவடிக்கை எடுக்க, தமிழ்நாடு நீா்ப்பாசன துறை வலியுறுத்த வேண்டும் என்றாா்.

அப்போது, உயா்நிலைக் குழு உறுப்பினா் சுதா தா்மலிங்கம், இளைஞரணி மாநிலச் செயலாளா் மகேஸ்வரன், கோட்டூா் ஒன்றியச் செயலாளா் தெய்வமணி, ஊட்டமலை குமாா் உள்ளிட்ட நிா்வாகிகள் உடனிருந்தனா்.