நீச்சல் குள உயிர் காப்பாளர்களுக்கான பயிற்சி முகாம்

கிருஷ்ணகிரி மாவட்ட விளையாட்டு அரங்கில் உள்ள நீச்சல் குளத்தில் நீச்சல் குள உயிர் காப்பாளர்களுக்கான 4 நாள் பயிற்சி முகாம் திங்கள்கிழமை தொடங்கியது.

இந்தப் பயிற்சியில் நீர்நிலைகள், நீச்சல்குளம், இதர விபத்துகள் மூலம் ஏற்படும் உயிரிழப்பைத் தடுப்பது குறித்து பயிற்சி அளிக்கப்படுகிறது. இதில் தமிழகத்தின் பல்வேறு மாவட்டங்களில் இருந்து நீச்சல் குள உயிர் காப்பாளர்கள் மற்றும் தனியார் பள்ளிகளைச் சேர்ந்த நீச்சல் குள உயிர் காப்பாளர்கள் 42 பேர் பங்கேற்றுள்ளனர். ராஜா, செபஸ்டியன் ஆகியோர் பயிற்சி அளிக்கின்றனர்.

மாற்றுத்திறன் குழந்தைகளுக்கான

இலவச மருத்துவ முகாம்

கிருஷ்ணகிரியில் மாற்றுத்திறன் கொண்ட குழந்தைகளுக்கான இலவச மருத்துவ முகாம் திங்கள்கிழமை நடைபெற்றது.

அனைவருக்கும் கல்வி இயக்கம் சார்பில், கிருஷ்ணகிரி வட்டார வளமையத்தில் நடைபெற்ற மாற்றுத் திறன் கொண்ட குழந்தைகளுக்கான இலவச மருத்துவ முகாமிற்கு வட்டார வளமைய மேற்பார்வையாளர் ஜோதிமணி தலைமை வகித்தார். மாவட்ட முதன்மைக் கல்வி அலுவலர் வே.தமிழரசு குத்துவிளக்கேற்றி முகாமை தொடக்கி வைத்தார். இந்த முகாமில் மருத்துவக் குழுவினர் பரிசோதித்தனர் நடத்தினர். இதில் காதொலிக் கருவி பெற - 15 பேர், அறுவைச் சிகிச்சைக்கு 7 பேர், சிறப்பு காலணிக்கு 5 பேர், சக்கர நாற்காலிக்கு 13 பேர் என மொத்தம் 44 பேர் உதவி உபகரணங்கள் பெற பரிந்துரை செய்யப்பட்டனர்.

மேலும், 33 மாணவர்களுக்கு புதிய அடையாள அட்டை, 23 பேருக்கு பேருந்துக் கட்டண சலுகை, 18 மாணவர்களுக்கு ரயில் இலவசப் பயண அடையாள அட்டை, 58 பேருக்கு கல்வி உதவித்தொகை, 47 மாணவர்களுக்கு பேச்சுப் பயிற்சி, 32 பேர் வாழ்வியல் திறன் பயிற்சி வழங்க பரிந்துரை செய்யப்பட்டனர்.

முகாமில் 200 மாற்றுத்திறன் மாணவர்கள், 150 பெற்றோர் என 350 பேர் கலந்துகொண்டனர். முகாமிற்கான ஏற்பாடுகளை வட்டார வளமைய சிறப்பாசிரியர்கள் அருண்குமார், ரமேஷ், முருகன், கித்தீன் உள்ளிட்டோர் செய்திருந்தனர்.