கர்நாடகத்துக்கு மணல் கடத்தியதாக இருவர் கைது

ஒசூர் வழியாக கர்நாடக மாநிலத்துக்கு மணல் கடத்திச் சென்ற 2 லாரிகளை பறிமுதல் செய்த போலீஸார், இருவரை கைது செய்தனர்.

ஒசூர் அடுத்த மத்திகிரி காவல் நிலையப் போலீஸார் தமிழக எல்லையான கொத்தஜூகூர் பிரிவு சாலையில் திங்கள்கிழமை வாகனச் சோதனையில் ஈடுபட்டிருந்தனர். அப்போது அவ்வழியாக வந்த இரு லாரிகளை நிறுத்திச் சோதனை செய்தபோது, கர்நாடக மாநிலம், பெங்களூருக்கு மணல் கடத்திச் செல்வது தெரியவந்தது. இதையடுத்து, லாரிகளை பறிமுதல் செய்த போலீஸார் தேன்கனிக்கோட்டை தேவநத்தம் பகுதியைச் சேர்ந்த வெங்கடேஷ் (38), லட்சுமிபுரம் பகுதியைச் சேர்ந்த கோவிந்தன் (24) ஆகிய இருவரையும் கைது செய்தனர்.