பர்கூரில் ஏடிஎம் மையத்தில் கொள்ளை முயற்சி

பர்கூரில் உள்ள வங்கியின் ஏடிஎம் மையத்தில் பணியில் இருந்த காவலாளியுடன் சேர்ந்து பணத்தைக் கொள்ளையடிக்க முயன்ற கும்பலை போலீஸார் புதன்கிழமை கைது செய்தனர்.
கிருஷ்ணகிரி மாவட்டம், பர்கூரில் உள்ள ஒரு ஏடிஎம்  மையத்தில், அங்கிநாயனப்பள்ளியைச் சேர்ந்த சிதம்பரம்(27) என்பவர் காவல் பணியில் ஆகஸ்ட் 24-ஆம் தேதி இருந்தார்.
அப்போது, அவரது கூட்டாளிகளான திருப்பூரைச் சேர்ந்த சகோதர்கள் விஜயகுமார் (28), வினோத்குமார்(25), சேலம், பெருமாள் கோயில் மேடு பகுதியைச் சேர்ந்த சூரியா (எ) இளஞ்சூரியன் (22), பர்கூர் அருகே அங்கிநாயனப்பள்ளி கிராமத்தைச் சேர்ந்த கார்த்திக் (எ) சக்திவேல் (25) ஆகியோர் இணைந்து ஏடிஎம் மைய இயந்திரத்தை உடைத்து பணத்தைக் கொள்ளையடிக்க முயன்றனர். 
இந்த முயற்சி, தோல்வி அடைந்த நிலையில் வங்கி நிர்வாகம் அளித்த புகாரின்பேரில் பர்கூர் போலீஸார் வழக்குப் பதிந்து விசாரணை நடத்தி வந்தனர். இந்த நிலையில், காவலாளி சிதம்பரம், கூட்டாளிகளுடன் ஏடிஎம் மையத்தில் கொள்ளையடிக்க முயன்றது விசாரணையில் தெரியவந்தது.
இதையடுத்து பர்கூர் போலீஸார், காவலாளி சிதம்பரத்தையும், அவர் கொடுத்த தகவலின்பேரில் விஜயகுமார், வினோத்குமார், இளஞ்சூரியன், சக்திவேல் ஆகியோரையும் புதன்கிழமை கைது செய்தனர்.
மேலும், கொள்ளையடிக்க பயன்படுத்திய கேஸ் வெல்டிங் இயந்திரம், கடப்பாரை,  கத்தி உள்ளிட்ட பொருள்களையும் பறிமுதல் செய்தனர்.