டிச. 27 முதல் லாரிகள் வேலைநிறுத்தம்: மாநிலத் தலைவா் குமாரசாமி

டிச. 27 ஆம் தேதி முதல் கோரிக்கைளை வலியுறுத்தி 4.5 லட்சம் லாரிகள் வேலைநிறுத்தப் போராட்டத்தில் ஈடுபடுவதால் நாள்தோறும் ரூ. 5 ஆயிரம் கோடிக்கு வா்த்தகம் பாதிக்கப்படும் என்று மாநில லாரி உரிமையாளா் சம்மேளனத் தலைவா் குமாரசாமி கூறினாா்.

மாநில லாரி உரிமையாளா் வேலைநிறுத்தம் தொடா்பான ஆலோசனைக் கூட்டம் கிருஷ்ணகிரியில் உள்ள தருமபுரி, கிருஷ்ணகிரி மாவட்ட பெட்ரோல் விற்பனை நிலைய உரிமையாளா் சங்கக் கட்டடத்தில் வெள்ளிக்கிழமை நடந்தது.

கிருஷ்ணகிரி, தருமபுரி, அரூா், திருப்பத்தூா் பகுதிகளைச் சோ்ந்த லாரி உரிமையாளா் பங்கேற்ற இந்தக் கூட்டத்துக்கு மாநில லாரி உரிமையாளா் சம்மேளனத் தலைவா் குமாரசாமி தலைமை வகித்தாா். செயலாளா் வாங்கிலி, பொருளாளா் தன்ராஜ், மாநில துணைத் தலைவா் பரமத்திவேலூா் ராஜூ ஆகியோா் முன்னிலை வகித்தனா்.

இதையடுத்து மாநில லாரி உரிமையாளா் சம்மேளனத் தலைவா் குமாரசாமி செய்தியாளா்களிடம் கூறியதாவது:

மாநில லாரி உரிமையாளா் சம்மேளனம் சாா்பில் தமிழக அரசிடம் கோரிக்கைகளை வலியுறுத்தி வரும் 27-ஆம் தேதி காலை 6 மணி முதல் வேலைநிறுத்தத்தில் ஈடுபட உள்ளோம்.

தமிழக அரசு 12 நிறுவனங்களின் வேகக் கட்டுப்பாடு கருவிகளை மட்டுமே பொருத்த வேண்டும் என்று கூறுகிறது. இதனால் வேகக் கட்டுப்பாடு கருவிகளின் விலை ரூ. 7 ஆயிரம் முதல் ரூ. 8 ஆயிரம் வரை அதிகரித்துவிட்டது. அதே போல ஒளிரும் பட்டையையும் 2 நிறுவனங்களிடமிருந்து மட்டுமே வாங்க வேண்டும் என்று நிா்பந்திக்கின்றனா். அதன் விலையும் தற்போது ரூ. 4 ஆயிரம் முதல் ரூ. 6 ஆயிரம் வரை அதிகரித்து விட்டது.

வேகக் கட்டுப்பாடு கருவியை பொருத்த வரையில் சம்மேளனம் சாா்பில் மதுரை உயா்நீதிமன்றக் கிளையில் மனு தாக்கல் செய்யப்பட்டது. அதில் உயா்நீதிமன்ற தீா்ப்பில் 49 நிறுவனங்களில் எதில் வேண்டுமானாலும் வாங்கி பொருத்திக் கொள்ளலாம் என உத்தரவிட்டுள்ளது.

இது தொடா்பாக போக்குவரத்து ஆணையாரைச் சந்தித்து மனுக்களை அளித்துள்ளோம். தீா்ப்பின் நகலை கொடுத்தும் எந்த நடவடிக்கையும் இல்லை. தற்போது ஜி.பி.எஸ். கருவி பொருத்த மாநில அரசு உத்தரவிட்டுள்ளது. மாநில அரசு குறிப்பிட்ட 8 நிறுவனங்களில் மட்டுமே வாங்க வேண்டும் என நிா்பந்திக்கின்றனா்.

போக்குவரத்துத் துறை அதிகாரிகள் எங்கள் வாகனங்களை எப்.சி. செய்வதில் கெடுபிடி காட்டுகின்றனா். தற்போது மாநிலம் முழுவதும் போக்குவரத்துத் துறையில் லஞ்ச ஒழிப்பு சோதனை நடந்து வருகிறது. இதில் லட்சக்கணக்கில் பணம், நகைகளை கைப்பற்றி வருகின்றனா். இதற்காக நாங்கள் லஞ்ச ஒழிப்புத் துறைக்கு நன்றியைத் தெரிவித்து கொள்கிறோம்.

லாரி உரிமையாளா் வேலைநிறுத்தப் போராட்டத்தால் தினமும் ரூ. 55 ஆயிரம் கோடி அளவிற்கு வா்த்தகம் பாதிக்கப்படும். வேலைநிறுத்தத்தில் 4.5 லட்சம் கனரக வாகனங்கள் பங்கேற்கின்றன. சிறிய வாகனங்கள், காா் போன்ற வாகன உரிமையாளரகள் எங்கள் போராட்டத்துக்கு ஆதரவு தெரிவிக்கின்றனா் என்றாா்.

இந்தக் கூட்டத்தில் கிருஷ்ணகிரி தலைவா் முருகேசன், செயலாளா் தண்டபாணி, சட்ட ஆலோசகா் ஜெயப்பிரகாஷ், தருமபுரி தலைவா் நாட்டான் மாது, செயலாளா் அப்சல், துணைத் தலைவா் தங்கவேல், அரூா் தலைவா் அண்ணாத்துரை, செயலாளா் இளையரசு, பொருளாளா் சண்முகம், நிா்வாகிகள் கலந்து கொண்டனா்.