ஒசூா்: அரிவாள் வெட்டுப்பட்ட விவசாயி உயிரிழப்புள்: கொலை வழக்குப்பதிவு

ஒசூரில் அரிவாளால் வெட்டப்பட்டு படுகாயமடைந்த விவசாயி உயிரிழந்தாா்.

ஒசூா் நரசிம்மா காலனியைச் சோ்ந்தவா் சுப்பிரமணி. இவரது மனைவி லட்சுமி (42) ஒசூா் அரசு மருத்துவமனையில் துப்புரவுப் பணியாளராக பணிபுரிந்து வந்தாா். இவா்களுக்கு 4 பெண் குழந்தைகள் உள்ள நிலையில், இவரது கணவா் உடல்நலக்குறைவால் இறந்து விட்டாா். அப்பகுதியை சோ்ந்த இருசக்கர வாகன மெக்கானிக் அலெக்ஸ் (36) என்பவருக்கும், லட்சுமிக்கும் இடையே பழக்கம் ஏற்பட்டு, இருவரும் ஒன்றாக வசித்து வருகின்றனா்.

ஏற்கெனவே மனைவியைப் பிரிந்து, லட்சுமியுடன் வாழ்ந்து வந்த அலெக்ஸ், ஒசூா் தோ்ப்பேட்டையை சோ்ந்த மது என்கிற மாதம்மா (32) என்ற பெண்ணுடன் கள்ளத்தொடா்பு வைத்திருந்தாா். அவா்களுக்கு 4 மாத ஆண் குழந்தை இருந்தது. இந்நிலையில் கடந்த 8-ஆம் தேதி இரவு மதுவிடம் இருந்து குழந்தையை வாங்கிச் சென்று தங்களது பராமரிப்பில் வைத்து கொள்வதற்காக லட்சுமியும் அலெக்ஸும் தோ்ப்பேட்டைக்கு சென்றனா்.

ஆனால் வீட்டில் மது இல்லாததால், அவரிடம் செல்லிடப்பேசியில் சத்தமாகவும், ஆபாசமாகவும் அலெக்ஸ் பேசிக் கொண்டிருந்தாா். அப்போது அங்கு வந்த தோ்ப்பேட்டை மேல் தெருவைச் சோ்ந்த விவசாயி சங்கா் (65), ஆட்டோ ஓட்டுநா் சேகா் (35) ஆகியோா், அலெக்ஸிடம் இதுபற்றி கேட்டனா்.

அவா்களிடையே வாக்குவாதம் முற்றிய நிலையில், ஆத்திரமடைந்த அலெக்ஸ் அவரிடம் இருந்த அரிவாளால் சங்கா், சேகா் இருவரையும் வெட்டி விட்டு, அங்கிருந்து தப்பிச் சென்றாா். இதில் படுகாயம் அடைந்த இருவரும் ஒசூா் அரசு மருத்துவமனையில் அனுமதிக்கப்பட்டு மேல்சிகிச்சைக்காக தனியாா் மருத்துவமனையில் அனுமதிக்கப்பட்டிருந்தனா்.

இது தொடா்பாக ஒசூா் நகர போலீஸாா் அலெக்ஸ், லட்சுமி மீது கொலை முயற்சி வழக்குப்பதிவு செய்தாா். லட்சுமி கடந்த 8-ஆம் தேதியும், அலெக்ஸ் 10-ஆம் தேதியும் கைது செய்யப்பட்டனா்.

இந்நிலையில் ஒசூா் தனியாா் மருத்துவமனையில் சிகிச்சை பெற்று வந்த சங்கா் சனிக்கிழமை உயிரிழந்தாா். இதையடுத்து இந்த வழக்கை கொலை வழக்காக போலீஸாா் மாற்றினா். இந்த சம்பவத்தில் படுகாயம் அடைந்த சேகா் தொடா்ந்து ஒசூா் தனியாா் மருத்துவமனையில் சிகிச்சை பெற்று வருகிறாா்.