ஒசூா் மாநகராட்சியில் திமுக 100 சதவிகிதம் வெற்றிபெற வேண்டும்: எம்எல்ஏ ஒய்.பிரகாஷ்

நகா்ப்புற உள்ளாட்சித் தோ்தலில் ஒசூா் மாநகராட்சியில் திமுக 100 சதவிகிதம் வெற்றிபெற வேண்டும் என கிருஷ்ணகிரி மேற்கு மாவட்டச் செயலாளரும், ஒசூா் எம்எல்ஏவுமான ஒய்.பிரகாஷ் தெரிவித்தாா்.

கிருஷ்ணகிரி மேற்கு மாவட்ட திமுக அவசர செயற்குழுக் கூட்டம் வெள்ளிக்கிழமை நடைபெற்றது.

இந்தக் கூட்டத்துக்கு தலைமை வகித்து அவா் பேசியதாவது:

நகா்ப்புற உள்ளாட்சித் தோ்தலில் போட்டியிடும் வேட்பாளா் யாா் என்பதை திமுக தலைமைதான் முடிவு செய்யும். வெற்றி வாய்ப்பை அறிந்து வேட்பாளா்கள் அறிவிக்கப்படுவா். கூட்டணி கட்சியினரும் திருப்தி அடையும் வகையில் வாா்டுகளை ஒடுக்கீடு செய்ய வேண்டும்.

உள்ளாட்சித் தோ்தலில் போட்டியிட வாய்ப்பு பெறுவோா், வாக்காளா்களை மூன்று முறை சந்தித்து வாக்கு சேகரிக்க வேண்டும். பெண்களுக்கு இலவச பேருந்து பயணம், ஆவின் பால் விலை குறைப்பு, பெட்ரோல் விலை போன்ற திமுகவின் சாதனைகளை விளக்கி வாக்கு சேகரிக்க வேண்டும்.

9 மாவட்ட ஊரக உள்ளாட்சித் தோ்தலில் திமுக 96 சதவிகிதம் வெற்றி பெற்றுள்ளது. நகா்ப்புற உள்ளாட்சித் தோ்தலில் 100 சதவிகிதம் வெற்றிபெற வேண்டும்.

ஒசூா் என்றாலே முதல்வா் மு.க.ஸ்டாலின் தனிக் கவனம் செலுத்தி வருகிறாா். இங்கு திமுக வெற்றிபெற்றால் கூடுதல் கவனம் பெற்று விரைவாக வளா்ச்சித் திட்டங்கள் செயல்படுத்தப்படும். எனவே திமுக 100 சதவிகித வெற்றிக்கு அனைவரும் பாடுபட வேண்டும் என்றாா்.

இந்தக் கூட்டத்தில் முன்னாள் எம்எஸ்ஏக்கள் எஸ்.ஏ.சத்யா, பி.முருகன், மாவட்ட அவைத் தலைவா் அ.யுவராஜ், தலைமை செயற்குழு உறுப்பினா் தா.சுகுமாறன், சிறுபான்மைப் பிரிவு மாநில துணைத் தலைவா் விஜயகுமாா், மாவட்ட துணைச் செயலாளா் தனலட்சுமி, இலக்கிய அணி மாவட்ட அமைப்பாளா் எல்லோரா மணி, பொறியாளா் அணி மாவட்ட அமைப்பாளா் ஞானசேகரன், மாணவரணி மாவட்ட அமைப்பாளா் ராஜா, முன்னாள் கவுன்சிலா்கள் கே.ஜி.பிரகாஷ், இக்ரம் அகமத், முன்னாள் ஒன்றியக் குழுத் தலைவா் சா்வேஷ் உள்ளிட்ட பலா் கலந்து கொண்டனா்.