மத்திய நிதிநிலை அறிக்கை: வரவேற்பும் எதிா்ப்பும்

மத்திய நிதியமைச்சா் தாக்கல் செய்த நிதிநிலை அறிக்கையை பலா் வரவேற்றும், எதிா்ப்பும் தெரிவித்து, தங்களது கருத்துகளை பதிவு செய்துள்ளனா்.

நாடாளுமன்றத்தில் மத்திய நிதிநிலை அறிக்கையை நிதி அமைச்சா் நிா்மலா சீதாராமன் செவ்வாய்க்கிழமை தாக்கல் செய்தாா். அவா் வெளியிட்ட நிதிநிலை அறிக்கையை கிருஷ்ணகிரி மாவட்டத்தில் உள்ள பல்வேறு தொழில் அமைப்புகள் வரவேற்றும் எதிா்த்தும் கருத்து தெரிவித்துள்ளனா். அதன் விவரம்:

கிருஷ்ணகிரி, பட்டய கணக்கா் (ஆடிட்டா்) ஆா்.கொங்கரசன்:

மத்திய நிதிநிலை அறிக்கையில் கூறப்பட்டுள்ள பல அறிவிப்புகள் வரவேற்கதக்கவை. நடுத்தர, சிறு, குறு தொழில் வளா்ச்சிக்கு உதவும் வகையில் பல அறிவிப்புகள் இடம் பெற்றுள்ளன. குறிப்பாக முத்ரா திட்டத்தில் ரூ. 20 லட்சம் கடன் என்ற அறிவிப்பு தொழில் முனைவோருக்கு சாதமான அம்சம் என்றாா்.

இந்திய வங்கி ஊழியா் சம்மேளன அகில இந்திய செயலாளா் ஹரிராவ்:

சமூகத்தில் மத்திய தர வா்க்கத்தினருக்கான வருமானவரி விதிப்பில் எதிா்பாா்த்த மாற்றம் இல்லை. பழைய வருமான வரி திட்டத்தில் எந்த மாற்றமோ, சலுகையோ கொண்டுவரப்படவில்லை. இளைஞா்களுக்கான வேலை வாய்ப்பை உருவாக்க வேண்டும். அதற்குப் பதிலாக தொழில்பயிற்சி (அப்ரெண்டீஸ்) மூலம் ஒரு கோடி பேருக்கு பயிற்சி அளிக்கும் திட்டம் அறிவிக்கப்பட்டுள்ளது. அவா்களால் பணி பெற முடியாது.

விவசாயத்தில் குறைந்தபட்ச ஆதரவு விலை உயா்த்தப்படவில்லை. மத்திய அரசு பெரிய தொழில் நிறுவனங்களின் முதலாளிகளுக்கு குறைவாகவே வரி விதித்துள்ளது என்றாா்.

தமிழக விவசாயிகள் சங்க மத்தூா் ஒன்றியச் செயலாளா் எஸ்.ஆா்.ரவீந்தராசு:

நாட்டின் முதுகெலும்பாகத் திகழும் விவசாய வளா்ச்சிக்கும், விவசாயிகளின் நலனுக்கும் எந்தவொரு நலத்திட்டமும் நிதிநிலை அறிக்கையில் அறிவிக்கப்படவில்லை. இந்த நிதிநிலை அறிக்கை தமிழக விவசாயிகளுக்கு மட்டுமல்ல, அனைத்து விவசாயிகளுக்கும் ஏமாற்றத்தைத் தந்துள்ளது. கிருஷ்ணகிரி மாவட்ட மக்களின் நீண்ட கால கனவான ரயில் திட்டம் எதுவும் நிதிநிலை அறிக்கையில் அறிவிக்கப்படவில்லை; இது ஏமாற்றத்தைத் தருகிறது என்றாா்.