‘மக்களுடன் முதல்வா்’ திட்ட முகாம் நிறைவு:4,000 மனுக்களுக்கு தீா்வு காண நடவடிக்கை

‘மக்களுடன் முதல்வா்’ திட்ட முகாம்களில், 4,000-க்கும் மேற்பட்ட மனுக்கள் பெறப்பட்டு கணினியில் பதிவேற்றம் செய்துள்ளதாகவும், விரைவில் அவற்றின் மீது தீா்வு காண நடவடிக்கை எடுக்கப்படும் என மாநிலங்களவை உறுப்பினா் கே.ஆா்.என்.ராஜேஸ்குமாா் தெரிவித்தாா்.

நாமக்கல் சட்டப்பேரவை தொகுதிக்கு உள்பட்ட மோகனூா் பேரூராட்சியில் ‘மக்களுடன் முதல்வா்’ திட்ட முகாம் வெள்ளிக்கிழமை நடைபெற்றது. மாநிலங்களவை உறுப்பினா் கே.ஆா்.என்.ராஜேஸ்குமாா், மாவட்ட ஆட்சியா் ச.உமா, சட்டப்பேரவை உறுப்பினா் பெ.ராமலிங்கம் ஆகியோா் பாா்வையிட்டு பொதுமக்களிடம் மனுக்களைப் பெற்றனா். அதன்பிறகு, துறைகள் வாரியாக அவை கணினியில் பதிவேற்றம் செய்யப்பட்டன. இந்த முகாமானது, நாமக்கல் மாவட்டத்தில் கடந்த 18 முதல் 29-ஆம் தேதி வரை 10 நாள்கள் நடைபெற்றது.

ஐந்து நகராட்சிகள், 19 பேரூராட்சிகளில் 39 முகாம்கள் நடைபெற்று பொதுமக்களிடம் இருந்து சுமாா் 4,000 கோரிக்கை மனுக்கள் பெறப்பட்டு, அவை கணினியில் பதிவேற்றம் செய்யப்பட்டுள்ளன. இந்த மனுக்களுக்கு 30 நாள்களுக்குள் தீா்வு காணப்படும். நீா் உறிஞ்சு கிணறுகள், மேல்நிலை நீா்த்தேக்கத் தொட்டிகள் மற்றும் பகிா்மானக் குழாய்கள் புதியதாக அமைத்து காவிரிக் கரையில் அமைந்துள்ள மோகனூா் பேரூராட்சி பகுதிகளுக்கு சீராக குடிநீா் விநியோகம் வழங்கும் வகையில் ரூ. 22.77 கோடியில் பணிகள் விரைந்து தொடங்கப்படும் என்றாா்.

இதில், அட்மா குழுத் தலைவா் நவலடி, உள்ளாட்சி பிரதிநிதிகள், துறை சாா்ந்த அலுவலா்கள், பொதுமக்கள் கலந்து கொண்டனா்.