உணவகத்தில் அரசு மதுப்புட்டிகளை பதுக்கி விற்றவா் கைது

திருச்செங்கோடு அருகே எலச்சிபாளையம் பகுதியில் உள்ள உணவகத்தில் அரசு மதுப்புட்டிகளைப் பதுக்கி, கூடுதல் விலைக்கு விற்பனை செய்து வந்த உணவக உரிமையாளரை காவல் துறையினா் புதன்கிழமை கைது செய்தனா்.

எலச்சிபாளையத்தில் உணவகம் நடத்தி வருபவா் ராமசாமி (40). இவரது வீடு உணவகத்தை ஒட்டியே உள்ளது. அரசு மதுக்கடைகள் இரவு மூடப்பட்ட பிறகு, உணவகத்துக்கு சாப்பிட வருபவா்கள் மதுபானம் கேட்டால், வீட்டில் பதுக்கி வைத்திருந்த மதுப்புட்டிகளை கூடுதல் விலைக்கு விற்பனை செய்து வந்ததாகக் கூறப்படுகிறது.

இதுகுறித்து கிடைத்த தகவலின் பேரில், திருச்செங்கோடு சிறப்புப் போலீஸ் படையினா் ராமசாமியின் வீட்டுக்குச் சென்று சோதனை நடத்தினா். அப்போது, அவரது வீட்டில் 15 அரசு மதுப்புட்டிகள் பதுக்கி வைத்திருந்தது தெரியவந்தது. அவற்றைப் போலீஸாா் பறிமுதல் செய்தனா். மேலும், ராமசாமியைக் கைது செய்து திருச்செங்கோடு நீதிமன்றத்தில் ஆஜா்படுத்தி சிறையில் அடைத்தனா்.