மேட்டூர் அணையின் நீர்மட்டம் 119.82 அடியாகக் குறைந்தது

நீர்வரத்து சரிந்ததால்,  மேட்டூர் அணையின் நீர்மட்டம் புதன்கிழமை காலை 119.82 அடியாகக் குறைந்தது.
காவிரியின் நீர்ப்பிடிப்புப் பகுதிகளில் கன மழை குறைந்துள்ளது. இதனால் மேட்டூர் அணைக்கு நீர்வரத்து படிப்படியாகக் குறைந்து, புதன்கிழமை காலை அணைக்கு நீர்வரத்து  நொடிக்கு 8 ஆயிரம் கன அடியாகச் சரிந்தது. 
காவிரி டெல்டா பாசனத்துக்கும்,  கிழக்கு, மேற்கு  கால்வாய் பாசனங்களுக்கும் அணையிலிருந்து நொடிக்கு 15, 800 கனஅடி வீதம் தண்ணீர் திறக்கப்படுகிறது. அணைக்கு நீர்வரத்தை விட, பாசனத்துக்கு கூடுதலாக நீர் திறக்கப்படுவதால் கடந்த 8 நாள்களாக நிரம்பிய நிலையில் இருந்த மேட்டூர் அணையின் நீர்மட்டம் குறையத் தொடங்கியுள்ளது.
இதையடுத்து, புதன்கிழமை காலை நீர்மட்டம் 119.82 அடியாக இருந்தது. அணையின் நீர் இருப்பு 93.18 டி.எம்.சி.யாக இருந்தது.