தூக்குக்கயிறு மாட்டி விவசாயிகள் போராட்டம்

வாழப்பாடியில் விவசாய நிலங்களுக்கு மேல் உயர்மின் கோபுரங்கள் அமைக்க எதிர்ப்புத் தெரிவித்து தொடர் போராட்டத்தில் ஈடுபட்டுள்ள விவசாயிகள், 8-ஆவது  நாளான திங்கள்கிழமை தூக்குக்கயிறு மாட்டி நூதனப் போராட்டத்தில் ஈடுபட்டனர்.  
விளைநிலங்களில் உயர்மின் கோபுரங்கள் அமைக்கும் திட்டத்தை கைவிடக் கோரியும், சாலையோரங்களில் புதைவட முறையில் மின்சாரத்தை கொண்டுச் செல்ல மத்திய, மாநில அரசுகளை வலியுறுத்தியும், சேலம், நாமக்கல் மாவட்டத்தின் பல்வேறு பகுதிகளைச் சேர்ந்த விவசாயிகள், விவசாயிகள் சங்கப் பிரதிநிதிகள், வாழப்பாடியை அடுத்த சேசன்சாவடியில் கொட்டகை அமைத்து தங்கி, 8-ஆவது நாளாக தொடர் போராட்டம் நடத்தி வருகின்றனர்.
ஞாயிற்றுக்கிழமை முதல் தொடர் உண்ணாவிரதப் போராட்டத்தில் ஈடுபட்டுள்ள விவசாயிகள், திங்கள்கிழமை தூக்குக் கயிறு மாட்டி நூதனப் போராட்டத்தில் ஈடுபட்டனர். 
போராட்டத்தில் பங்கேற்ற விவசாயிகள் சங்கப் பிரதிநிதிகள் கூறியது: விவசாய நிலங்களுக்கு மேல் உயர்மின் கோபுரங்கள் வழியாகச் செல்லும் மின்சாரம், கிழே வசிக்கும் விவசாயிகளுக்கு மரண பயத்தை ஏற்படுத்துகிறது. ஏற்கெனவே அமைத்த உயர்மின் கோபுரங்களுக்கே இன்னும் உரிய நிவாரணம் வழங்கவில்லை. இந்நிலையில் எட்டாவது நாளாக தொடர் காத்திருப்புப் போராட்டம் நடத்திய எங்களின் கோரிக்கை குறித்து கேட்பதற்கு கூட இந்த அரசு தயாராக இல்லை என்றனர்.