கார் மீது வேன் மோதியதில் பாதிரியார் பலி

சேலம் அருகே கார் மீது வேன் மோதியதில் பாதிரியார் உயிரிழந்தார்.
சேலம்  கந்தம்பட்டி பகுதியைச் சேர்ந்த ஜெபமணி மகன் ஆதம் ராஜா பிலிப் (35).  இவர் சிவதாபுரத்தில் உள்ள  திருச்சபையில் கடந்த நான்கு ஆண்டுகளாக பாதிரியாராக பணியாற்றி வந்தார். 
இவர் செவ்வாய்க்கிழமை (செப்.11)  வாடகை காரில்  ஈரோட்டுக்குச் சென்று விட்டு புதன்கிழமை சேலத்துக்கு திரும்பி வந்து கொண்டிருந்தார். காரை சேலம் நெத்திமேடு மணியனூரைச் சேர்ந்த விஜய் (34)  ஓட்டி வந்துள்ளார்.
அப்போது சேலத்தில் இருந்து கோவை நோக்கிச்சென்று கொண்டிருந்த  வேனை பரமத்தி வேலூரைச் சேர்ந்த செந்தில்குமார் (30) ஓட்டிச் சென்று கொண்டிருந்தார். அரியானூர் அருகே கடத்தூர்  பிரிவு சாலையில் வேன் சென்ற போது, குறுக்கே வந்த இருசக்கர வாகனம் மீது மோதாமல் இருக்க வேனை ஓட்டுநர் திரும்பியுள்ளார்.
அப்போது கட்டுப்பாட்டை இழந்த வேன் சாலையின் நடுவில் உள்ள தடுப்பின் மீது ஏறி எதிர்சாலையில் வந்து கொண்டிருந்த கார் மீது மோதி விபத்துக்குள்ளானது.
இதில் காரின் முன்சீட்டில் அமர்ந்திருந்த பாதிரியார் ஆதம் ராஜா பிலிப் நிகழ்விடத்திலேயே உயிரிழந்தார். ஓட்டுநர் விஜய் காயமடைந்தார்.  பாதிரியாருக்கு  திருமணமாகி மஞ்சுளா என்ற மனைவி உள்ளார்.
இந்த விபத்து குறித்து ஆட்டையாம்பட்டி போலீஸார் வழக்குப் பதிவு செய்து விசாரித்து வருகின்றனர்.