திருமணிமுத்தாற்றை மீட்க கையெழுத்து இயக்கம்

பாஜக விவசாய அணி சாா்பில், சேலம், திருமணிமுத்தாறு மீட்பு இயக்கம் சாா்பில் 1 லட்சம் கையெழுத்து பெறும் இயக்கம் புதன்கிழமை தொடங்கியது.

சேலம் அருகே உத்தமசோழபுரம் பகுதியில் உள்ள திருமணிமுத்தாறு கரையில் நடைபெற்ற 1 லட்சம் கையெழுத்து பெறும் இயக்கத்தை பாஜக விவசாய அணி மாநிலத் தலைவா் ஜி.கே.நாகராஜ் கையெழுத்திட்டு தொடங்கி வைத்தாா்.

இதில், நிா்வாகிகள் வெ.சுரேந்திரன், பெரியசாமி, வழக்குரைஞா் மணிகண்டன் உள்ளிட்டோா் கலந்துகொண்டனா். பொதுமக்கள் பலரும் ஆா்வத்துடன் வந்து கையெழுத்திட்டு சென்றனா்.

இது தொடா்பாக, விவசாய அணி தலைவா் ஜி.கே.நாகராஜ் செய்தியாளா்களிடம் கூறுகையில், தமிழக அரசு நிறைவேற்றும் திட்டம் அனைத்துத் தரப்பு மக்களுக்கும் சென்றடைய வேண்டும்.

திருமணிமுத்தாற்றில் கழிவுநீா் ஓடுகிறது. இதை சீரமைக்க 1 லட்சம் கையெழுத்து பெற்று முதல்வரிடம் வழங்க உள்ளோம். நடவடிக்கை எடுக்கவில்லையெனில் போராட்டம் நடத்துவோம். வேளாண் சட்டத்துக்கு எதிராக போராடுபவா்கள் விவசாயிகள் இல்லை. இடைத்தரகா்கள் போராட்டம் நடத்தி வருகின்றனா். எட்டு வழிச்சாலை திட்டம் நல்ல திட்டமாகும். இதனால் தொழில்வளம் பெருகும் என்றாா்.

இதுகுறித்து சேலம் கிழக்கு மாவட்ட விவசாய அணி தலைவா் வெ.சுரேந்திரன் கூறுகையில், திருமணிமுத்தாற்றை சீரமைக்க 1 லட்சம் கையெழுத்து பெற்று மத்திய அமைச்சரிடம் மனு கொடுக்க உள்ளோம் என்றாா்.