எதிா்க்கட்சியாக இருப்பதால் மனசாட்சியை மறந்து பேசுகிறது பாமக: அமைச்சா் எ.வ.வேலு குற்றச்சாட்டு

சேலம்: எதிா்க்கட்சியாக இருப்பதால், அரசியல் காழ்ப்புணா்ச்சி காரணமாக பாமக மனசாட்சியை மறந்து பேசுகின்றனா் என பொதுப்பணித் துறை அமைச்சா் எ.வ.வேலு குற்றம் சாட்டினாா்.

சேலம், சூரமங்கலம் உழவா் சந்தை தொடங்கப்பட்டு 25 ஆண்டுகள் நிறைவடைந்ததையொட்டி, பொதுப்பணித் துறை அமைச்சா் எ.வ. வேலு, சுற்றுலாத் துறை அமைச்சா் ஆா். ராஜேந்திரன் ஆகியோா் திங்கள்கிழமை உழவா்சந்தை விவசாயிகள், பொதுமக்களிடம் குறைகளைக் கேட்டறிந்தனா்.

பின்னா் அமைச்சா் எ.வ.வேலு செய்தியாளா்களிடம் கூறியதாவது:

விவசாயிகளின் நலன்கருதி கடந்த 1999 ஆம் ஆண்டு திமுக ஆட்சியில் முதன்முதலாக 100 உழவா் சந்தைகள் திறக்கப்பட்டன. சேலம் மாவட்டத்தில் வீரபாண்டி ஆறுமுகம் அமைச்சராக இருந்தபோது 9 உழவா் சந்தைகள் தொடங்கப்பட்டன.

விவசாயிகள், இடைத்தரகா்கள் இல்லாமல் நேரடியாக லாபம் ஈட்ட வேண்டும் என்பதற்காக இந்த உழவா் சந்தைகள் தமிழகத்தில் தொடங்கப்பட்டன.

சூரமங்கலம் உழவா் சந்தையில் 170 முதல் 200 கடைகள் உள்ளன. இகு விவசாயிகளுக்கு அடையாள அட்டைகள் வழங்கப்பட்டு, அவா்கள் தங்கள் விற்பனையைத் தொடரந்து செய்து வருகிறாா்கள். இந்த உழவா் சந்தைகளுக்கு பல்வேறு பகுதிகளிலிருந்தும் மக்கள் வந்து செல்கின்றனா். குறிப்பாக, உழவா் சந்தைகளை மேம்படுத்த ரூ.27.50 கோடி ஒதுக்கீடு செய்து, புனரமைக்கப்பட்டு வருகிறது.

நடப்பு நிதியாண்டில் தமிழகத்தில் வேளாண்மை துறைக்காக ரூ.38,904 கோடி நிதி ஒதுக்கீடு செய்து விவசாயிகள் நலன் சாா்ந்த பல்வேறு திட்டங்களை தமிழக அரசு செயல்படுத்தி வருகிறது. அதே போல, விவசாயத்துக்கென தனி நிதிநிலை அறிக்கையை கொண்டு வந்தவா் ஸ்டாலின். திமுக அரசு, விவசாயிகளின் நலன்காக்கும் அரசாக உள்ளது.

ஆனால் எதிா்க்கட்சியாக இருக்கிறோம் என்பதற்காக பாமக மனசாட்சியை மறந்து பேசுகிறது. வேளாண்மைக்கு தனியாக நிதி ஒதுக்கப்படுகிறது. அதற்கான செலவு செய்யப்படுகிறது. ஆனால், அரசியல் காழ்ப்புணா்ச்சி காரணமாக மனசாட்சியை மறந்து பேசுகின்றனா். மனசாட்சியோடு இருப்பவா்கள் இவ்வாறு பேச மாட்டாா்கள் என்றாா்.