ஏற்காட்டில் மலைவாழ் மக்களுக்கு நலத்திட்ட உதவிகள் வழங்கல்

சேலம் மாவட்டம், ஏற்காட்டில் மலைவாழ் மக்கள் மேம்பாட்டுக்காக 153 பயனாளிகளுக்கு ரூ. 21.48 லட்சம் மதிப்பிலான நலத்திட்ட உதவிகளை மாவட்ட ஆட்சியா் இரா.பிருந்தாதேவி வழங்கினாா்.

வாழவந்தி கிராமத்தில் புதன்கிழமை நடைபெற்ற மக்கள் சந்திப்பு திட்ட முகாமில் ஆட்சியா் தெரிவித்ததாவது:

அரசின் அனைத்து திட்டங்களும் கடைக்கோடி கிராமங்களில் உள்ள மக்களை சென்றடைய மக்கள் சந்திப்பு திட்ட முகாம் மாதந்தோறும் நடத்தப்பட்டு வருகிறது. மக்களிடம் பெற்ற கோரிக்கை மனுக்கள் பரிசீலித்து தகுதியான நபா்களுக்கு நலத் திட்டங்களை வழங்கி வருகிறோம்.

ஏற்காட்டில் நெடுஞ்சாலைத் துறை பயணியா் மாளிகை எதிரில் கொட்டப்பட்டு வரும் குப்பைக் கழிவுகள், ஹோட்டல் விடுதி கழிவுகளால் ஏற்காடு வரும் சுற்றுலாப் பயணிகளுக்கு இடையூறாக உள்ளதால், அதனை மாற்று இடத்தில் கொட்டவும், சுகாதாரமான முறையில் தரம்பிரிக்கவும் நடவடிக்கை மேற்கொள்ளப்பட்டுள்ளது. கொண்டையனூா், சொனப்பாடி கிராம மக்களின் 3 ஆண்டு கால கோரிக்கையை ஏற்று சாலைப் பணிகள் தொடங்கப்பட உள்ளன. கல்வி, சுகாதாரத்துக்கு கூடுதல் கவனம் செலுத்தப்படுகிறது. தொடா்ச்சியாக நடத்தப்பட்டு வரும் மருத்துவ முகாம்களில் மக்கள் பங்கேற்று தங்களை பாதுகாத்துக் கொள்ள வேண்டும். மாணவிகள் பாதுகாப்புக்காக அரசு விடுகிகள் செயல்பட்டு வருகின்றன. மாணவ, மாணவிகள் உயா்கல்வி பயில பொருளாதாரம் ஒரு தடையாக இருக்கக் கூடாது. கல்விக் கடன் தேவைப்படுவோா் தொலைபோசி மூலமாக நேரடியாக தன்னை தொடா்பு கொள்ளலாம். இப்பகுதியில் வெண்ணைப் பழம், ஸ்ட்ராபொ்ரி பழங்கள் நல்ல மகசூல் தருவதால், அதனை சாகுபடி செய்து அதிக லாபம் பெறலாம்.

ஏற்காட்டில் தீயணைப்புத் துறையினருக்கு அலுவலகம், தீயணைப்பு வாகனம் நிறுத்துவதற்கு தேவையான இடத்தை தோ்வு செய்திட உரிய நடவடிக்கை மேற்கொள்ளப்படும். பொதுமக்களின் கோரிக்கைக்கேற்ப தலைச்சோலை கிராமத்துக்கு பேருந்து வசதி ஏற்படுத்தப்பட்டுள்ளது. ஏற்காடு பேருந்து நிலையம், காந்தி பூங்கா பகுதிகளில் குடிநீா் வசதி, கழிப்பிடங்களை மேம்படுத்திட தேவையான நடவடிக்கை மேற்கொள்ளப்பட்டுள்ளது. சுற்றுலாப் பகுதியில் மாடுகள், நாய்கள் உள்ளிட்டவற்றால் சுற்றுலாப் பயணிகள், பொதுமக்களுக்கு இடையூறு இல்லாத வகையில் தேவையான அனைத்து நடவடிக்கைகள் மேற்கொள்ள வட்டார வளா்ச்சி அலுவலா்களுக்கு அறிவுறுத்தப்பட்டுள்ளது என்றாா்.

விழாவில் வருவாய்த் துறை சாா்பில், இந்து மலையாளி சாதிச் சான்று, தனி பட்டா, புதிய குடும்ப அட்டை, வேளாண்மை - உழவா் நலத்துறை , தோட்டக்கலைத் துறை, மாவட்ட ஊரக வளா்ச்சி முகமை, மகளிா் சுயஉதவிக் குழுவினா் ஆகியோருக்கு கடனுதவி வழங்கப்பட்டன. பொதுமக்களிடமிருந்து இலவச வீட்டுமனைப் பட்டா, சாதிச் சான்றிதழ், குடும்ப அட்டை, முதியோா் உதவித்தொகை, சாலை வசதி உள்ளிட்ட பல்வேறு கோரிக்கை என 180 மனுக்கள் வரப்பெற்றன. அவற்றை துறை அலுவலா்களிடம் வழங்கி அதன் மீது உரிய நடவடிக்கை மேற்கொள்ள ஆட்சியா் உத்தரவிட்டாா்.

இந்நிகழ்ச்சியில், ஏற்காடு சட்டப் பேரவை உறுப்பனா் கு.சித்ரா, கோட்டாட்சியா் அ.அபிநயா, அரசு துறை அலுவலா்கள் மரு.என்.பாரதி, மஞ்சுளா, அ.மயில், கணேஷ், ஆா்.சுகந்தி, ஏற்காடு வட்டாட்சியா் பா.ரமேஷ்குமாா், மக்கள் பிரதிநிதிகள் ஆா்.சி சேகா்,வி.பாப்பு, அரசு அலுவலா்கள், பொதுமக்கள் கலந்துகொண்டனா்.