சேலம் தெற்கில் தொடரும் புதுமுகங்கள்: மீண்டும் துளிா்க்குமா இரட்டை இலை?

சேலம் மாநகரப் பகுதியில் உள்ள தொகுதிகளில் ஒன்றான சேலம் தெற்கு தொகுதியில் இந்த முறையும் பிரதான கட்சிகளான திமுகவும், அதிமுகவும் புதுமுகத்தையே களமிறக்கியுள்ளன.

நடைபெறவுள்ள தோ்தலில், அதிமுகவில் தற்போதைய எம்எல்ஏ பாலசுப்பிரமணியனுக்கு மீண்டும் வாய்ப்பு மறுக்கப்பட்டுள்ளது. தொகுதிக்கு புதிய முகமான புகா் மாவட்ட கைத்தறி பிரிவு செயலாளா் ஜெ. வினோத் அதிமுக வேட்பாளராக களமிறக்கப்பட்டுள்ளாா். திமுக சாா்பில் கட்சியின் தலைமை பொதுக்குழு உறுப்பினா் லோகநாதன் போட்டியிடுகிறாா். தொகுதியில் போட்டியிடும் இருவரும் புதுமுகங்கள்.

இதேபோல, தமிழக வெற்றிக் கழகம் சாா்பில் அக்கட்சியின் மத்திய மாவட்ட செயலாளா் தமிழன் பாா்த்திபன் நிறுத்தப்பட்டுள்ளாா். நாம் தமிழா் கட்சி சாா்பில் சோபியா வீரசமா் களமிறங்கியுள்ளாா்.

சௌராஷ்டிரா, கன்னட செட்டியாா்கள், சோழிய வேளாளா், முதலியாா், வன்னியா் ஆகியோா் நிறைந்த இந்தத் தொகுதியில், பிற சமூகத்தவரும் குறிப்பிட்ட அளவில் உள்ளனா். இந்தத் தொகுதியில் சமூக வாக்குகளும் வெற்றியை தீா்மானிப்பதால், முக்கிய கட்சிகள் அனைத்தும் தொகுதியில் கணிசமாக உள்ள சமூகத்தினரையே களமிறக்கியுள்ளன.

பாஜக, பாமக, அமமுக, தமாகா உள்ளிட்ட கட்சிகளின் துணையுடன் களமிறங்கியுள்ள அதிமுக, இந்த முறையும் வெற்றியை தனதாக்க மிகுந்த நம்பிக்கையுடன் களப்பணியாற்றி வருகிறது. தொகுதியில் புதிய முகம் வேட்பாளராக அறிவிக்கப்பட்டுள்ளதால், மாநகர அதிமுகவினா் சற்று சோா்வடைந்தாலும், இரட்டை இலையை முன்னிறுத்தி வாக்குகளை சேகரித்து வருகின்றனா்.

அதேபோல, காங்கிரஸ், தேமுதிக, இடதுசாரிகள், விசிக உள்ளிட்ட கட்சிகளின் ஆதரவுடன் களமிறங்கியுள்ள திமுக வேட்பாளா் லோகநாதன், கூட்டணி கட்சி நிா்வாகிகளுடன் திமுக அரசின் 5 ஆண்டு சாதனைகளை எடுத்துக் கூறி, வீதிவீதியாகச் சென்று உதயசூரியன் சின்னத்துக்கு வாக்கு சேகரித்து வருகிறாா்.

அதிமுக, திமுக என்ற பிரதான கட்சிகளுக்கு சற்றும் சளைக்காமல், தவெகவின் விசில் சப்தம் தொகுதி முழுவதும் கேட்பதை காணமுடிகிறது. காரணம், தவெக மத்திய மாவட்டச் செயலாளரும், அக்கட்சியின் முன்னணி நிா்வாகிகளுள் ஒருவருமான தமிழன் பாா்த்திபன் போட்டியிடுவது தான். விஜய் ரசிகா்கள் பட்டாளத்துடன் தொகுதி முழுவதும் வளையவரும் இவா், கணிசமான வாக்குகளைப் பெறுவாா் என்பதால், அதிமுக, திமுக என இரண்டு கட்சிகளும் சற்று கலக்கமடைந்துள்ளன.

தொகுதியை பொறுத்தவரை மறுசீரமைப்புக்கு பின்னா் நடைபெற்ற அனைத்து தோ்தல்களிலும் அதிமுகவே வெற்றி வாகை சூடியுள்ளதால், இந்த முறையும் அதே உற்சாகத்துடன் களமிறங்கியுள்ளது.

எப்படியாவது அதிமுகவிடம் இருந்து தொகுதியை தட்டிப்பறிக்க திமுகவும் முழுவீச்சில் களப்பணியாற்றி வருகிறது. அதேநேரத்தில், பிரதான கட்சிகளுடன் தமிழக வெற்றிக் கழக வேட்பாளரும் மல்லுகட்டுவதால், தொகுதியில் மும்முனை போட்டி ஏற்பட்டுள்ளது என்பதே தற்போதைய களநிலவரம்.

சி.ஆா்.எம். சபரி