சேலம் வழியாகச் சென்ற ரயிலில் 8 கிலோ கஞ்சா பறிமுதல்

சேலம் வழியாக கேரளத்துக்குச் சென்ற விரைவு ரயிலில் கேட்பாரற்றுக் கிடந்த பையில் இருந்த 8 கிலோ கஞ்சாவை ரயில்வே போலீஸாா் செவ்வாய்க்கிழமை பறிமுதல் செய்தனா்.

ஒடிஸா, ஆந்திர மாநிலங்களில் இருந்து தமிழகம், கேரளத்துக்குச் செல்லும் ரயில்களில் கஞ்சா, குட்கா உள்ளிட்ட போதைப்பொருள்கள் கடத்தப்படுவதைத் தடுக்க, ரயில்வே போலீஸாா் தனிப்படைகள் அமைத்து சோதனை நடத்தி வருகின்றனா்.

அந்த வகையில், சேலம் உட்கோட்ட தனிப்படை போலீஸாா் செவ்வாய்க்கிழமை புதுதில்லி - திருவனந்தபுரம் இடையே இயக்கப்படும் கேரள விரைவு ரயிலில் சோதனை நடத்தினா். அப்போது, ரயிலின் பின்பக்க பொதுப் பெட்டியில் கழிப்பறைக்கு அருகே கேட்பாரற்றுக் கிடந்த பையைச் சோதனையிட்டனா்.

அதில் 8 கிலோ கஞ்சா இருந்தது தெரியவந்தது. இதையடுத்து, கஞ்சாவைப் பறிமுதல் செய்த போலீஸாா், அந்த பெட்டியில் பயணம் செய்தவா்களிடம் விசாரணை நடத்தினா். எனினும், கஞ்சாவைக் கடத்தி வந்தவா் குறித்த தகவல் கிடைக்கவில்லை.

இதையடுத்து, பறிமுதல் செய்யப்பட்ட 8 கிலோ கஞ்சாவை சேலம் ரயில்வே போலீஸாரிடம் தனிப்படையினா் ஒப்படைத்தனா்.