ஓமலூா் அருகே செங்கல் வியாபாரி வெட்டிக் கொலை

ஓமலூா் அருகே செங்கல் வியாபாரி வெட்டிக் கொலை செய்யப்பட்ட சம்பவத்தில், சந்தேகத்தின் பேரில் அவரது மனைவியிடம் போலீஸாா் விசாரணை நடத்தி வருகின்றனா்.

சேலம் மாவட்டம், ஓமலூா் அருகே உள்ள வேலகவுண்டன்புதூரைச் சோ்ந்தவா் பூபதி (45). செங்கல் வியாபாரியான இவா், மனைவி சுஜிதாஸ்ரீ (31), 2 பிள்ளைகளுடன் வசித்து வந்தாா்.

செவ்வாய்க்கிழமை அதிகாலை 4 மணி அளவில் ஓமலூா் - சங்ககிரி சாலையில் உள்ள ஆட்டுக்காரனூா் கூட்டுறவு சங்கம் அருகே பூபதி ரத்த வெள்ளத்தில் காரில் சடலமாக கண்டெடுக்கப்பட்டாா்.

தகவல் அறிந்து வந்த ஓமலூா் டிஎஸ்பி கபிலன், ஆய்வாளா் சண்முகம் தலைமையிலான போலீஸாா் உடலைக் கைப்பற்றி, பரிசோதனைக்காக சேலம் அரசு மருத்துவமனைக்கு அனுப்பி வைத்தனா். பின்னா், பூபதியின் வீட்டுக்கு சென்று விசாரணை நடத்தினா்.

அதில், ‘கணவருடன் காரில் சென்றபோது, வழியில் சிறுநீா் கழிக்க அவா் காரை நிறுத்தினாா். அப்போது, அங்கு வந்த 3 போ் கொண்ட கும்பல் கணவரை கத்தியால் வெட்டிக்கொலை செய்து, நான் அணிந்திருந்த 9 பவுன் சங்கிலி உள்பட 12 பவுன் தங்க நகையைப் பறித்து கொண்டு தப்பியோடினா்’ என அவரது மனைவி சுஜிதாஸ்ரீ தெரிவித்தாா்.

ஆனால், பூபதியின் தங்கை பூங்கொடி மற்றும் குடும்பத்தினா் பூபதியின் இறப்பில் சந்தேகம் இருப்பதாக ஓமலூா் காவல் நிலையத்தில் புகாா் அளித்தனா். மேலும், பூபதிக்கும், சுஜிதாஸ்ரீக்கும் இடையே அடிக்கடி தகராறு ஏற்பட்டு வந்ததாகவும் தெரிவித்தனா்.

இதுகுறித்து சுஜிதாஸ்ரீயிடம் போலீஸாா் நடத்திய விசாரணையில், சுஜிதாஸ்ரீக்கு வேறு ஒருவருடன் முறையற்ற உறவு இருந்துள்ளது. இதனால் கணவன் - மனைவி இடையே தினமும் பிரச்னை ஏற்பட்டுள்ளது. இந்நிலையில் பூபதி கொல்லப்பட்டுள்ளதால், சுஜிதாஸ்ரீக்கு இதில் தொடா்பு உள்ளதா என போலீஸாா் விசாரணை நடத்தி வருகின்றனா்.