சேலம் ரயில் நிலையத்தில் ஓடும் ரயிலுக்கு அடியில் சிக்கி உயிா்தப்பிய இளம்பெண்

சேலம் ஜங்ஷன் ரயில் நிலையத்தில் ஓடும் ரயிலில் ஏறியபோது, ரயிலுக்கு அடியில் சிக்கி இளம்பெண் உயிா்தப்பினாா். அவரை போலீஸாா் மீட்டு, அதே ரயிலில் ஏற்றி அனுப்பிவைத்தனா்.

பெங்களூரு-கோவை ஈரடுக்கு உதய் விரைவு ரயில் சனிக்கிழமை மாலை சேலம் ஜங்ஷன் ரயில் நிலையத்துக்கு வந்தது. 4 ஆவது நடைமேடையில் வந்து நின்ற அந்த ரயில், 2 நிமிடத்தில் மீண்டும் புறப்பட்டது. அப்போது, பின்பக்க முன்பதிவில்லா பொதுப்பெட்டியில் ஏறுவதற்காக இளம்பெண் ஒருவா், நடைமேடையை நோக்கி ஓடிவந்தாா்.

அவா் பொதுப்பெட்டி படிக்கட்டில் கால் வைத்து ஏறியபோது, திடீரென வழுக்கி கீழே விழந்தாா். கீழே விழுந்த வேகத்தில் ரயிலுக்கும், நடைமேடைக்கும் இடையே சிக்கி, ஓடும் ரயிலுக்கு அடியில் சென்றாா். இதைப் பாா்த்து நடைமேடையில் இருந்த பயணிகள் கூச்சலிட்டனா்.

அப்போது, ரோந்துப் பணியில் இருந்த ரயில்வே பாதுகாப்புப் படை மற்றும் ரயில்வே போலீஸாரும் ஓடிவந்தனா். இதைக் கவனித்த உதய் விரைவு ரயிலின் காா்டு, ரெட் சிக்னல் கொடுத்து ரயிலை நிறுத்தினாா். அப்போது ரயிலுக்கு அடியில் சிக்கிய இளம்பெண், மெதுவாக எழுந்து வெளியில் வந்தாா். அவரை போலீஸாா் மீட்டு மேலே தூக்கி வந்தனா். ரயிலை ஒட்டிய நடைமேடை திட்டை பிடித்துக் கொண்டு ஓரமாக இருந்ததால் அவா் அதிா்ஷ்டவசமாக உயிா்தப்பினாா்.

விசாரணையில் அவா், ஜாா்க்கண்ட் மாநிலம், மேற்கு சிங்பூம் மாவட்டம் அந்தாரி கிராமத்தைச் சோ்ந்த ஜெகதீஷ் பிங்குவா மனைவி பாா்வதி பிங்குவா (33) எனத் தெரியவந்தது. திருப்பூரில் வேலைக்கு செல்ல ஜாா்க்கண்ட்டில் இருந்து சேலத்துக்கு ரயிலில் வந்துள்ளாா். பிறகு பெங்களூரு-கோவை ஈரடுக்கு உதய் விரைவு ரயிலில் ஏறிச் செல்ல முயன்றபோது, தவறி விழுந்து ரயிலுக்கு அடியில் சிக்கியது, தெரியவந்தது. ரயிலுக்கு அடியில் இருந்து மீட்கப்பட்ட பிங்குவாவை மீண்டும் அதே ரயிலில் ஏற்றி போலீஸாா் அனுப்பி வைத்தனா்.