காவல் நிலையத்தில் காதல் ஜோடி தஞ்சம்

சென்னை காவல் சார்பு-ஆய்வாளரின் மகள் தனது காதலனை திருமணம் செய்துகொண்டு, திண்டுக்கல் மாவட்டக் காவல் கண்காணிப்பாளர் அலுவலகத்தில் சனிக்கிழமை தஞ்சம் அடைந்தார்.

திண்டுக்கல் ஆரோக்கியமாதா தெருவைச் சேர்ந்தவர் ராசய்யா. இவரது மகன் பிரான்சிஸ் ஆன்டோ பிரின்ஸ் (23). சென்னையில் வேலைபார்த்து வந்தார். சென்னை கொளத்தூரைச் சேர்ந்த சுரேந்திரன், வேப்பேரி காவல் நிலையத்தில் சார்பு-ஆய்வாளராக பணியாற்றி வருகிறார். இவரது மகள் சிந்து (22), அங்குள்ள ஒரு பள்ளியில் ஆசிரியையாக பணிபுரிந்து வந்தார்.

இந்நிலையில், பிரான்சிஸ் ஆன்டோ மற்றும் சிந்து ஆகியோருக்கு இடையே காதல்  ஏற்பட்டுள்ளது. இருவரும் திருமணம் செய்வதற்கு முடிவு செய்துள்ளனர். ஆனால், சுரேந்திரன் எதிர்ப்பு தெரிவித்துள்ளார். அதனையும் மீறி திருமணம் செய்துகொண்ட இவர்கள், திண்டுக்கல் மாவட்டக் காவல் கண்காணிப்பாளர் அலுவலகத்தில் சனிக்கிழமை தஞ்சமடைந்தனர். இவர்களிடம், திண்டுக்கல் அனைத்து மகளிர் காவல் நிலைய போலீஸார் விசாரணை நடத்தி வருகின்றனர்.