திண்டுக்கல் மாவட்ட ஆவின் தலைவராக முன்னாள் எம்எல்ஏ தேர்வு

திண்டுக்கல் மாவட்ட கூட்டுறவு பால் உற்பத்தியாளர்கள் ஒன்றியத்தின்(ஆவின்) தலைவராக முன்னாள் அதிமுக எம்எல்ஏ ஏ.டி.செல்லச்சாமி புதன்கிழமை தேர்ந்தெடுக்கப்பட்டார். 
திண்டுக்கல் மாவட்ட ஆவின் நிர்வாகக் குழு உறுப்பினருக்கான தேர்தல் கடந்த 12ஆம் தேதி நடைபெற்றது. இதில் மொத்தமுள்ள 17 இடங்களுக்கு, 17 பேர் மட்டுமே போட்டியிட்னர். இதனால் அனைவரும் போட்டியின்றி தேர்ந்தெடுக்கப்பட்டனர். அதன் தொடர்ச்சியாக, ஆவின் தலைவர் மற்றும் துணைத் தலைவருக்கான தேர்தல் புதன்கிழமை நடைபெற்றது.  
 இதில், தலைவர் பதவிக்கு ஒட்டன்சத்திரம் தொகுதி முன்னாள் எம்எல்ஏ ஏ.டி.செல்லச்சாமி, தருமத்துப்பட்டியைச் சேர்ந்த ஆர்கே.சுப்பிரமணியன் ஆகியோர் போட்டியிட்டனர். அதேபோல், துணைத் தலைவர் பதவிக்கு சிவலிங்கம், சிவமுருகன், மோகன்ராஜ் ஆகியோர் போட்டியிட்டனர். தேர்தல் அலுவலர் ஆர்.இரணியன் முன்னிலையில் வாக்குப் பதிவு நடைபெற்றது. தலைவர் பதவிக்கான தேர்தலில் 12 வாக்குகளைப் பெற்ற ஏ.டி.செல்லச்சாமி வெற்றி பெற்றார். சிவசுப்பிரமணியன் 5 வாக்குகளை மட்டுமே பெற்றார்.
 அதேபோல் துணைத் தலைவர் பதவிக்கான தேர்தலில் 10 வாக்குகளைப் பெற்ற சிவலிங்கம் வெற்றி பெற்றார். சிவமுருகன் 5 வாக்குகளும், மோகன்ராஜ் 2 வாக்குகளும் பெற்றனர்.