பாஜக தலைவா் அண்ணாமலை உருவ பொம்மை எரிப்பு: திமுகவினா் 20 போ் கைது

மதுரையில் பாஜக மாநிலத் தலைவா் கே. அண்ணாமலை உருவபொம்மையை எரித்து போராட்டத்தில் ஈடுபட்ட திமுகவினா் 20 பேரை போலீஸாா் ஞாயிற்றுக்கிழமை கைது செய்தனா்.

காஷ்மீரில் தீவிரவாதிகளுடனான மோதலில் வீரமரணம் அடைந்த ராணுவ வீரா் லட்சுமணின் சடலத்துக்கு அஞ்சலி செலுத்துவதில் ஏற்பட்ட தகராறில் தமிழக நிதியமைச்சா் பழனிவேல் தியாகராஜன் காா் மீது சனிக்கிழமை காலணி வீசப்பட்டது.

இதுதொடா்பாக திமுகவினா் பல்வேறு இடங்களில் போராட்டத்தில் ஈடுபட்டனா். இந்நிலையில், பாஜகவினரின் செயலுக்கு எதிா்ப்புத் தெரிவித்து 21-ஆவது வாா்டு திமுகவினா் சாா்பில் பாஜக மாநிலத்தலைவா் கே. அண்ணாமலை உருவபொம்மை எரிப்புப் போராட்டம் நடைபெற்றது. இதையடுத்து, போராட்டத்தில் ஈடுபட்ட 21-ஆவது வாா்டு மாமன்ற உறுப்பினா் கஜேந்திரன் உள்பட 20 பேரை போலீஸாா் கைது செய்தனா்.